Әлмәттә «Пятое колесо» күргәзмәсе 355 экспонат җыйды
Өч йөздән артык декоратив-гамәли иҗат шедевры һәм калдык материаллардан эшләнмәләр Әлмәттә «Пятое колесо» юбилейлы республика күргәзмәсе экспонатлары булды.
Эшләрнең авторлары - Татарстанның көньяк-көнчыгыш төбәгендә яшәүче 7-17 яшьлек балалар һәм үсмерләр. Эшләнмәләр арасында ни генә юк: пластилиннан, бисердан, күннән, кабырчыклардан, табигый материаллардан картиналар дисеңме, бизәлгән савыт-саба, кулдан ясалган курчаклар, бәйләм уенчыклармы.
Һәр эш уникаль, бик тырышып эшләнгән. Бәйгене оештыручылар аның елдан-ел баюын билгеләп үтә. Быел әнә 355 экспонат тупланган.
Күргәзмәдә күмәк иҗат эшләре дә, укытучы белән бергәләп ясалганнары да бар. Бәйгенең максаты яшь буынны иҗат белән шөгыльләнүгә җәлеп итүдән гыйбарәт.
Следите за самым важным и интересным в Telegram-каналеТатмедиа