Әлмәт драмтеатры җәлилчеләргә багышлап, документаль спектакль тәкъдим итте

25 август, Җәлилчеләрне искә алу көнендә Әлмәт драмтеатры "Идел-Урал" легионы вәкиле, якташыбыз Гарәф Фәхретдинов истәлекләре буенча "Кайда минем илем?.." документаль спектаклен тәкъдим итте. Режиссеры - Ильяс Гәрәев.

Легионерларның бер өлеше булган культвзвод һәм капелла артистлары тарихы бу.

Спектакльдә артистлар башкаруында татарның озын көйләре, итальян, поляк, француз җырлары яңгырый. Лейпциг архивында табылган тәлинкәләр арасында капелла башкаруындагы язмалар да тәкъдим ителә.

Спектакльдә Алмаз Шаһимәрдәнов, Татарстанның атказанган артисты Фазыл Насыйбуллин, Фаил Сафиуллин, Рифат Әхмәдиев, Айрат Мифтахов, Эльмир Нургалиев һәм театрга быел гына эшкә кайткан Рамазан Йосыпов катнаша. Куелышта Динар Хөснетдинов укыган шигырьләр дә яңгырый.