Татарстанның барлык мәктәпләре югары тизлекле интернетка ия булачак

Татарстанның барлык мәктәпләрендә бу ел ахырына югары тизлекле интернет тоташтырылачак. Бу хакта «Татар-информ» МА ТР Мәгариф һәм фән министрлыгының Мәгълүмати технологияләр һәм куркынычсызлык бүлеге әйдәп баручы киңәшчесе Рөстәм Зиннәтуллин хәбәр итте.

Агентлыкның әңгәмәдәше сүзләренә караганда, 2020 елның 31 декабренә кадәр республиканың 559 мәгариф оешмасы, ә бу 546 мәктәп һәм 13 көллият һәм техникум, Интернетка җепселле-оптик элемтә линияләре технологиясе буенча тоташтырылачак. "Бу "Цифровая экономика" милли проекты социаль әһәмиятле объектларын тоташтыру буенча федераль проект буенча эшләнәчәк", – дип сөйләде ул.

Моннан тыш, 522 оешма, шул исәптән 499 мәктәп һәм 23 Урта һөнәри белем бирү учреждениесе, бу елның 1 сентябренә кадәр «Связьинвестнефтехим» АҖ инвестиция программасы хисабына интернетка тоташтырылачак, дип билгеләп үтте Зиннәтуллин.

«Шулай итеп, Россиядә беренче тапкыр субъектның барлык мәктәпләре дә югары тизлекле интернетка ия булачак", - дип ассызыклады ул. Хәзерге вакытта Татарстан мәктәпләре Wi-Fi нокталары белән тәэмин ителгән, дип өстәде Зиннәтуллин.

Барлыгы 11 меңнән артык керү ноктасы урнаштырылган. «Әлбәттә, урнаштырылган Wi-Fi җайланмалары вакыт узу белән алмаштыруны таләп итә. Мондый эш республикада финанслау бүлеп бирү буенча планлы рәвештә алып барыла. Мәктәпләрдә урнаштырылган Wi-Fi җиһазларын модернизацияләү урта сроклы перспективада планлаштырыла", - дип тәмамлады ул.

Элегрәк Татарстан Президенты Рөстәм Миңнеханов барлык дәрәҗәләрдә һәркем өчен мөмкин булган һәм сыйфатлы белем алу өчен кирәкле шартлар булдыру мөһим, дип белдерде, бу хакта «Татар-информ» МА хәбәр итте.