Тимур Нагуманов: «Язгы кыр эшләрендә иң мөһиме - оперативлык һәм сыйфат»

30 мартта «Чагылтау» ҖЧҖ хуҗалыгы базасында район башлыгы Тимур Нагуманов катнашында язгы кыр эшләренә әзерләнүгә багышланган агроконференция узды. Анда авыл хуҗалыгы предприятиеләре, крестьян-фермер хуҗалыклары җитәкчеләре, авыл җирлекләре башлыклары, агрономнар, Россельхозцентр, Гостехнадзор, «Агроинновация» һәм «Таросмашинери» вәкилләре катнашты.

Конференцияне ачып, районның авыл хуҗалыгы һәм азык-төлек идарәсе башлыгы Фәнис Шәрәфиев катнашучыларны көн тәртибе белән таныштырды, төп мәсьәләләрне билгеләде.

Әлмәт районында сөрүлек мәйданы 80,3 мең гектар тәшкил итә, барлык чәчүлек мәйданы 64 мең гектардан артык, шуларның күпьеллык үләннәре узган елларда 8,8 мең гектар, язгы чәчү -40 мең гектар, шул исәптән бөртекле, техник һәм азык культуралары. Язгы кыр эшләрен башкару өчен 280 берәмлек трактор җәлеп ителәчәк, авыл хуҗалыгы техникасының әзерлеге - 100%. Район хуҗалыкларында 11 мең тоннадан артык орлык бар, 1 гектар чәчү мәйданына 60 кг.в. минераль ашлама тупланган.

Конференциянең гамәли өлеше хуҗалыкның машина-трактор паркында узды. «Чагылтау» ҖЧҖ районның алдынгы авыл хуҗалыгы формированиеләренең берсе. 11 берәмлек трактор, дистәләгән чәчү һәм бораулау агрегатлары әзерләнгән. Хуҗалык механизаторларына 502 гектардан артык язгы культуралар чәчәргә туры киләчәк.

Тимур Нагуманов техниканы тикшергәндә хуҗалык җитәкчеләренең игътибарын һәр агрегатны, язгы кыр кампаниясендә катнашучы техника берәмлеген әзерләүдә аларның шәхси җаваплылыгына юнәлтте.

Семинар вакытында аграрийларга уңышны арттыру буенча яңа технологияләр һәм ысуллар тәкъдим ителде, авыл хуҗалыгы культуралары корткычлары белән көрәшүнең иологик ысуллары турында сөйләделәр.

Семинарда катнашучылар шулай ук язгы кыр эшләренә әзерлек кысаларында үзйөрешле техниканы техник карау мәсьәләләре һәм механизаторларның гамәлдәге таныклыкларын яңарту процессы турында фикер алыштылар.

Конференциягә йомгак ясап, район башлыгы куелган бурычны үтәү өчен оештыру эшләренең мөһимлеген билгеләде.

- Могҗизалар булмый, без барыбыз да «Язгы көн ел ашата» дигән мәкальнең мәгънәсен яхшы аңлыйбыз. Быел дым бик күп түгел, шуңа күрә туфракта дым тоту  бик мөһим. Районда чәчү эшләрен кыска вакыт эчендә, матди ресурсларның, авыл хуҗалыгы техникасының, ягулык-майлау материалларының, орлыкларның, ашламаларның максималь концентрациясе белән башкарырга кирәк. Төп бурыч - оперативлык һәм сыйфат, -дип йомгаклады Тимур Нагуманов.

Фото: Әлмәт муниципаль районы башлыгы матбугат хезмәте