Татарстанда ел башыннан каршы як полосага чыгу аркасында 58 кеше һәлак булган. Куркыныч статистиканы киметү максатында, 26 августка кадәр республикада махсус рейд бара, ә кагыйдә бозучыларга зур штрафлар яки иректән мәхрүм итү яный.
Быелның 7 аенда Татарстанда каршы як полосага чыгу белән бәйле 112 һәлакәт теркәлгән, 58 кеше вафат булган, 172 кеше зыян күргән. Әлмәт районында гына да узып китү (обгон) кагыйдәсен бозу 5 кешенең гомерен өзгән.
Әлеге куркыныч очракларны булдырмау өчен, агымдагы елның 13-26 август көннәрендә республикада «Каршы як полоса» профилактик рейды үткәрелә.
Исегездә тотыгыз: тоташ сызык булганда, күперләрдә, борылышларда, күз күреме чикләнгән урыннарда һәм «узып китү тыела» билгесе астында узып китү катгый тыела!
Җәза чаралары:
- • Беренче тапкыр бозган өчен:5000 сум штраф яки 4-6 айга хокукларыннан мәхрүм итү.
- • Кабат бозган очракта: 1 елга машина йөртү хокукыннан мәхрүм итү.
- • Элек җәза алганнан соң кабат тотылсаң: 3 елга кадәр иректән мәхрүм итү (җинаять эше кузгатыла).
Татарстан Дәүләт автоинспекциясе юл хәрәкәте кагыйдәләрен төгәл үтәргә һәм игътибарлы булырга чакыра. Якыннарыгызның гомерен куркыныч астына куймагыз!