Бер атна эчендә әлмәтлеләр аферистларга 2 миллион сум акча биргән

Февральнең тулы булмаган атнасында Әлмәтнең 14 кешесенә аферистлар 2 миллион 100 мең сум зыян китергән. Мошенниклар классик схемалардан файдаланалар, яңаларын да уйлап табалар. Узган ел нәтиҗәләре һәм мошенниклар арасында иң киң таралган алдау ысуллары турында Әлмәт полиция бүлегендә узган брифингта фикер алыштылар.

Теләсә нинди аңлашылмаган хәлдә трубканы куегыз, дип киңәш итә полиция хезмәткәрләре. Әгәр сүз «туганыгыз бәлагә эләккән» дигән схема турында бара икән һәм вазифаи зат проблеманы башка нәрсә урынына түгәрәк сумма ярдәмендә хәл итәргә тәкъдим итә икән, берни дә күчермәгез. Бу, мөгаен, мошенниклар, чөнки чын хезмәткәрнең мондый гамәлләре ришвәт алу кебек карала һәм бу инде җинаять кодексының аерым маддәсе.

Тагын бер киң таралган схема  "сезнең акча куркыныч астында, шуңа күрә кредит алыгыз". Бу очракта мошенниклар эмоцияләргә генә түгел, ә гражданнарның мәгълүматлы булмавына да исәп тота. Әгәр зыян күрүче үзе кредит рәсмиләштергән икән, бурыч аңа эләгәчәк. 

Мошенниклар саны елдан-ел арта бара. Бу күрсәткеч буенча рекордлы елны Әлмәт хокук сакчылары 2020 нче ел дип атады: ул вакытта мондый очраклар 360 булган. 2022 елга нәтиҗәләр ясаганнан соң-900 очрак ачыкланган. 

"Бернинди банк та үз клиентына шалтыратып, клиентлары башкарган нинди дә булса операцияләр турында сорашмаячак",-дип мөрәҗәгать итә РФ эчке эшләр министрлыгының Әлмәт буенча җинаятьчеләрне эзләү бүлеге начальнигы Алексей Моренов.

"Беркайда да җиңел акча юк. Кешеләргә моны гомер буе истә тотарга кирәк. Гади генә итеп акча бирүче юк, аларны эшләп алырга кирәк", – дип ассызыклады РФ эчке эшләр министрлыгының Әлмәт районы буенча оператив эше буенча полиция башлыгы урынбасары Рөстәм Хәбибуллин.

 Элек алданучыларның  яше пенсиягә якын иде, хәзер хокук сакчылары сводкаларында яшьләр ешрак күренә.

"Барысы да инвестицияләргә акча салырга омтыла. Әмма алар башка сайтларга эләгәләр", - дип хәбәр итте Әлмәт районы буенча җинаятьчеләрне эзләү бүлеге башлыгы Алексей Моренов.

Гыйнвар аенда хокук сакчылары 6 эшне ачкан, 4се инде судка тапшырылган. Ә иң ерак командировкалары 2 мең километр озынлыкта, Новосибирскка килеп чыккан. Февральнең тулы булмаган беренче атнасында җирле полиция бүлегенә мошенникларга 14 гариза килгән. Гомумән алганда, аферистлар шәһәр халкына 2 миллион сумнан артык зыян китергән.