Әлмәткә юл-транспорт һәлакәтләре саны арту сәбәпле Казаннан махсус батальон килде

Әлмәткә, юл-транспорт һәлакәтләре саны арту сәбәпле, рейд үткәрү өчен Казаннан аерым махсуслаштырылган батальон ярдәмгә килде. Ел башыннан бирле шәһәрдә һәм районда 17 юл-транспорт һәлакәте теркәлгән, 10 кеше һәлак булган, 24 кеше яраланган.

"Агымдагы елның гыйнвар аенда Әлмәт районы территориясендә һәлак булучылар белән юл-транспорт һәлакәтләренең артуы теркәлгән. Аварияләрне киметү өчен Татарстан Республикасы ЮХИДИ идарәсенең аерым махсуслаштырылган батальонының шәхси составы тарафыннан юл хәрәкәте кагыйдәләрен тупас бозуларны профилактикалау буенча чара үткәрелә", – дип хәбәр итте полиция майоры, аерым махсуслаштырылган батальон командиры урынбасары Айрат Исмәгыйлев.

Рейдка 14 экипаж һәм 36 юл-патруль хезмәте хезмәткәре җәлеп ителде. Алар шәһәр һәм районның 6 ноктасында урнашкан. Документларны һәм транспорт чараларының торышын массакүләм тикшерү иртәдән башланды. 

Юлларда куркынычлыкны кисәтү һәм тәртип бозучыларны ачыклау-рейдның төп максаты. Мондый тикшерү автомобиль белән аек булмаган хәлдә идарә итүчеләрне һәм машина йөртү таныклыгыннан мәхрүм ителгән кешеләрне ачыкларга мөмкинлек бирә. 

Шулай ук автоинспекторлар башка хокук бозуларны, мәсәлән, тонировка кагыйдәләрен дә игътибарсыз калдырмыйлар.

Рейд вакытында шулай ук юл хәрәкәте кагыйдәләрен бозулар, штраф түләмәү, ОСАГО полисының булмавы һәм башкалар да чикләнде. 2 сәгать эчендә 32 хокук бозу очрагы ачыкланды. Бер шофер аек булмаган хәлдә руль артына утырган, аңа карата акт төзелгән, эш судка тапшырылачак. Дәүләт автоинспекциясе кагыйдәләрне үтәү зарурилыгы турында искә төшерә һәм барлык юл хәрәкәтендә катнашучыларны игътибарлы һәм сак булырга чакыра.