Әлмәттә туй ясау күпмегә төшә? [+ФОТОЛАР]

Тик акча мәсьәләсенә килгәндә затлы туй бәйрәменә кагылган исәпләр бары канатлы хыяллар исемлегендә генә кала. Банкет, кияү белән кәләшнең киемнәре, машиналар бизәү һәм башка вак-төяк өстәмә чыгымнар яшьләрнең кесәләренә бик каты бәрә. 

Барчасын кызыксындырган сорауга җавап бирү максатыннан шәһәрдә тикшерү эше уздырырга булдым. Исәпләү исемлеге нигезендә кәләшнең туй күлмәге 5000- 30000, фатасы 1000 – 2500, аяк киеме 1500 – 6000 сумны тәшкил итә. Әлбәттә, әлеге вакыйгага әзерләнгәндә мөһим урынны прическа һәм макияж алып тора. Аларга якынча 2000-3000 сум акча кирәк. Ә искиткеч чәчәк бәйләме 1500- 3000 сумга барып төшә. Эчке кием, маникюр, педикюр һәм башка вак-төяге белән бергә кәләшне әзерләү генә 30 - 50 меңгә чыга. 

Көндәлек тормышта ир-атка күп кирәкмәсә, аны туйга әзерләү процессы акча күләмен сизелерлек киметә. Аерым санаганда костюм 6000- 12 000, күлмәк 800- 2000, галстук 200 – 1000, аяк киеме 3000- 6000, каеш 500 һәм башка вак-төякләре 1000-2000 гә барып төшә. Кыскасы, кияүне туй мәҗлесенә әзерләү 20 – 30 меңгә чыга. Гашыйкларга һәм кунакларга машина арендалау 6- 9 000, аларны бизәү 1000 – 2000 гә чыга. 
Бүгенге көндә ЗАГСта язылышуга да шактый күп акча түләргә кирәк. Дәүләт пошлинасы 250 сум, тантаналы язылышу 1500 - 2400 гә чыга. 

Банкет мәҗлесенә әзерлек процессы бөтенләй “чишендерә”. Әлеге мәҗлесне уздыру өчен тиешле урын арендалау кеше саныннан тора икән. Бер кеше өчен 1500 – 2000 кирәк булса, 70 кеше өчен 140 мең дигән сүз. Моннан тыш, залны бизәү нәтиҗәсендә 35 – 40 мең сарыф ителә. 
Әлеге бәйрәм кирәгенчә кызык узсын өчен алып баручы хезмәтләрееннән башка булмый. Аңа 8 – 20 мең түләргә кирәк. Тынычлык теләсә нинди күңелле вакыйганың дошманы. Шуңа да музыкантлар мәҗбүри рәвештә булырга тиеш. Димәк , тагын 5 – 20 мең акча кирәк дигән сүз. 
Мул табын әзерләү кимендә 100 – 200 меңне тәшкил итә. 
Гомумән алганда, шәһәрдә истәлекле туй бәйрәме оештыру 400 – 500 меңгә чыга. Ә затлы туйга 600 – 800 мең акча кирәк икән. Бу саннарны күргәч, яшьләрнең шушы вакыйгага карата тискәре мөнәсәбәте тулысынча аңлашыла.

Гөлназ Фәхриева

Автор  фотолары