Татарстанда коронавирустан тагын 2 кеше вафат булган

ТР Сәламәтлек саклау министрлыгының матбугат хезмәте хәбәр итүенчә, Татарстанда тагын ике кеше яңа коронавирус инфекциясе корбаны булган.

1954 елгы ир-атны йогышлы авырулар госпиталенә «яңа коронавирус инфекциясе» диагнозы белән китергәннәр. Йөрәк-кан тамырлары авырулары кискенәю нәтиҗәсендә аның хәле тагын да начарланган.

Вируслы пневмония белән йогышлы авырулар госпиталенә китерелгән 1974 елгы ир-ат хроник авырулардан интеккән.

Ике очракта да патологоанатомик экспертиза үткәрү нәтиҗәсендә вирус идентификацияләнгән.

17 ноябрьгә Татарстанда яңа төрдәге Covid-19 коронавирус инфекциясеннән барлыгы 123 үлем очрагы теркәлде.