Әлмәттә ике кеше суга батып үлде

Республикада су коену сезоны 1 июньнән 30 августка кадәр ачык дип санала. Бүген Әлмәттә бары тик бер урында гына - шәһәр күлендә генә су коенырга ярый. Аның каршы ягында су керү тыела. Бу хакта эзләү-коткару посты начальнигы Фәсхетдин Сыраев әйтте. Күлдә 10 нан 20 сәгатькә кадәр коенырга рөхсәт ителә. Бу вакытта биш коткаручы ярдәмгә килергә әзер тора.
Шунысын да билгеләп үтәргә кирәк, Әлмәт районында ике кеше суга батып үлде инде. Березовка буасы һәм Бишмунчада батучы ир-атлар хәмер кулланган булган.