Әлмәттәге сәүдә үзәгенә килүчеләрне ялган янгын тревогасы аркасында эвакуацияләгәннәр

Социаль челтәрләрдә Әлмәттәге «Панорама» сәүдә үзәге каршында халык күп җыелган видео таралды. Ролик авторы янәсе бинада янгын чыгуы турында хәбәр иткән. Әмма янгын турындагы мәгълүмат расланмады. Россия Гражданнар оборонасы эшләре, гадәттән тыш хәлләр һәм бәла-каза нәтиҗәләрен бетерү министрлыгының Татарстан Республикасы буенча Баш идарәсе матбугат хезмәте автоматик янгын сүндерү сигнализациясенең ялган эшләве турында ачыклык кертте.

Сәбәбе сәүдә үзәгенең өченче катындагы тузан булган, анда кинотеатр биналарында ремонт эшләре алып барыла. Сәүдә үзәгенең куркынычсызлык хезмәте, протокол буенча, килүчеләрне эвакуацияләде. Җентекле тикшерүдән һәм реаль куркыныч булмауны раслаганнан соң, «Панорама» сәүдә үзәге гадәти режимда эшен яңартты.