Тимур Нагуманов әлмәтлеләрне паникага бирешмәскә өндәде

Әлмәт районы башлыгы Тимур Нагуманов кибетләрдәге ажиотажларга аңлатма бирде. Үзенең телеграмдагы турыдан-туры эфирында ул кече һәм урта эшмәкәрлек буенча оперштаб җитәкчесе Андрей Подоваловның азык-төлек челтәрләре: «Салям» һәм «Агат» сәүдә йортлары складларына баруы турында сөйләде.

"Товарлар бар, складларда бернинди ажиотажлар да күрмибез. Кибет киштәләрендә билгеле бер ажиотаж бар. Кызганычка каршы, бу киштәләр иртән тулы була, кибетләр ачыла, шунда ук иртәнге төркем керә, нинди дә булса максат өчен шикәр ала. <...> Полкалар да буш тора башлый", – дип ассызыклады Нагуманов.

Ул тәэмин итүчеләр товар алып килергә өлгерми, дип өстәде. Шулай ук кайбер кибетләрдә спекуляциягә юл куймас өчен сатып алуны чикли башлаганнар.

«Без бүген сезнең белән бу спекуляцияне куабыз. Шикәр кытлыгы турында бүген сүз булырга тиеш түгел. Әгәр без барыбыз да ашыгыч рәвештә шикәр сатып алырга йөгерәбез икән, күпмедер вакытка ул киштәдән юкка чыгарга мөмкин, чөнки аны берәү дә кибеткә шул күләмдә кертмәгән»,-дип аңлатты Әлмәт районы башлыгы.

"Бүген  ажиотажга һәм паникага бирешмәскә кирәк", - дип нәтиҗә ясады ул.

Шулай ук Тимур Нагуманов көн саен бәяләр мониторингы алып барылуы турында сөйләде.

«Бәяләрне, сез аңлыйсыздыр, без мөстәкыйль рәвештә билгеләмибез. Әмма бәяләрне арттыруның барлык фактлары да хәзер документлаштырыла, без аларны монополиягә каршы федераль хезмәткә, тиешле чаралар күрү һәм карау өчен җибәрә башладык. Бу монополиягә каршы федераль хезмәтнең вәкаләтләре, хезмәттәшләребез белән без элемтәдә», – диде район башлыгы.

Нагуманов монополиягә каршы федераль хезмәт белгечләренә ситуацияне анализлау өчен күпмедер вакыт кирәк булачагын билгеләп үтте. Әгәр дә спекулятив үсеш булса, билгеле бер чаралар күреләчәк.