Әлмәтлеләргә сентябрьдә җылыту өчен суммаларның каян алынуын аңлаттылар

Әлмәт халкы социаль челтәрләрдә сентябрьдә җылыту өчен түләүләр буенча ризасызлык белдерде. Шәһәр халкы аптырашта кала: җылы юк, ә аның өчен түләргә туры килә. Җирле хакимият вәкилләре бу саннарның каян һәм ничек алынуын аңлаттылар. Белгечләр әйтүенчә, түләү күләме күпфатирлы йортны җылылык энергиясен исәпкә алу приборлары белән җиһазландыруга бәйле.

«Әгәр өйдә шундый прибор урнаштырылган икән, түләү аның күрсәтмәләре буенча исәпләнә», – дип аңлата белгечләр.

 Әмма гомумйорт счетчигы булмаган очракта, җылылык өчен түләү татарстан төзелеш, архитектура һәм торак-коммуналь хуҗалык министрлыгы тарафыннан расланган җылылык энергиясе нормативлары буенча исәпләнә. Ягъни түләүне сентябрьдән апрельгә кадәр тигез өлешләр белән исәплиләр, фактта җылыту сезоны башлануга һәм тәмамлануга карамастан. Бүген Әлмәттә һәм Түбән Мактамада норматив буенча 146 йорт исәпләнә.

«Әгәр сезнең сентябрь квитанциясендә җылылык өчен түләү чагылдырылган икән, димәк, сезнең йорт алар исәбенә керә. Шунысы мөһим, җылыту буенча нормативның күләме йортның ничә катлы булуына, төзелгән елына һәм фатир мәйданына бәйле», – дип нәтиҗә ясадылар җирле администрация матбугат хезмәтендә.