Бюджет урыннарына гаризалар кабул итү 25 июльдә тәмамлана

Фән һәм югары белем министрлыгы мәгълүматларына караганда, Россиядәге вузларда бакалавриат һәм специалитет программаларына бюджет нигезендә укырга керү өчен документлар тапшыру 25 июльдә туктатыла. Бу хакта РИА Новости чыганаклары хәбәр итә.

27 июльдә югары уку йортлары үзләренең рәсми сайтларында һәм Дәүләт хезмәтләре порталында абитуриентларның конкурс рейтингларын бастырып чыгарачак.

Өстенлекләр белән керүчеләр, олимпиада җиңүчеләре һәм призерлары, шулай ук максатчан юнәлеш буенча укырга теләүчеләр өчен гаризалар 1 августка кадәр кабул ителә. Гомуми конкурска катнашучылар исә 5 августка кадәр укырга ризалыкларын белдерергә тиеш. Вузларның кабул итү турындагы карарлары 3 һәм 7 август көннәрендә рәсмиләштереләчәк.

Бу чорда «тынлык көннәре» дип аталган вакыт та каралган: андый көннәрдә абитуриентлар яңа документлар тапшыра да, иске гаризаларын кире кайтара да алмый.

Магистратураның бюджет урыннарына документлар тапшыру вакытын һәр вуз үзе мөстәкыйль билгели, ләкин бу срок 20 августтан соңга калдырыла алмый. Ә менә контракт (түләүле) нигезендә укырга керергә теләүчеләр өчен документлар тапшыру 20 сентябрьгә кадәр сузыла, һәм ул сайланган программага бәйле түгел.

Бүгенге көндә документларны кабул итү комиссияләренә барып, чиратта торасы юк – барлык процессларны онлайн рәвештә, Дәүләт хезмәтләре порталы аша гына башкарырга мөмкин. Моның өчен расланган хисап язмасы булу җитә. «Мәгълүматлар икътисады» милли проекты кысаларында эшләүче бу сервис илнең 1000 дән артык вузына документлар тапшырырга мөмкинлек бирә. 

Система белем турындагы документларны, өстенлекләрне һәм казанышларны үзе автоматик рәвештә күчереп ала. Абитуриентка бары тик уку формасын һәм юнәлешен генә сайларга кала. Бер үк вакытта абитуриент биш төрле вузга, һәрберсендә бишәр юнәлешкә кадәр гариза бирә ала. Шулай ук портал аша конкурс исемлекләрендә үзенең урынын реаль вакытта күзәтеп барырга һәм укырга кабул ителү турындагы хәбәрне алырга мөмкин.

Абитуриентлар документларны кабул итү комиссияләренә чират тормыйча гына тапшыра ала, кәгазь гариза кирәкми. Сервис Дәүләт хезмәтләре порталында бар һәм «Мәгълүматлар икътисады» илкүләм проекты буенча гамәлгә ашырыла. Бары тик расланган хисап язмасы гына кирәк, дип хәбәр итә "Татар-информ".