Татарстанда 120дән артык мәктәп укучысы «Мәктәп бизнес-старты» финалында көч сынашты

«Нәтиҗәле конкурентлыкка сәләтле икътисад» илкүләм проекты кысаларында узган «Мәктәп бизнес-старты» финалына Татарстанның төрле почмакларыннан 120дән артык мәктәп укучысы җыелды. Чара яшьләрнең оригиналь бизнес-идеяләрен сынау һәм аларга профессиональ бәя бирү мәйданчыгына әверелде. Бу хакта Татарстан Икътисад министрлыгының матбугат хезмәте хәбәр итә.

Форумда яшь катнашучылар традицион һөнәрләрдән башлап югары технологияле продуктларга кадәр киң спектрлы проектлар тәкъдим итте. Финал этабына Казаннан тыш, Минзәлә, Буа, Кама Тамагы, Теләче, Тәтеш, Бөгелмә һәм Сарман районнарыннан барлыгы 12 команда сайлап алынды.

Тәкъдим ителгән эшләнмәләр арасында экологик продукция җитештерү, балалар үсешенә ярдәм итүче мини-роботлар ясау, GPS-трекерлы аксессуарлар булдыру кебек инновацион юнәлешләр аеруча игътибарга лаек булды. Шулай ук яшь эшмәкәрләр татар печеньесы җитештерү һәм милли орнаментлы киемнәр тегү аша туган як гореф-гадәтләрен саклап калу һәм заманчалаштыру юнәлешен дә үстерергә омтылды.

Татарстан икътисад министрының беренче урынбасары, Эшмәкәрлекне үстерү департаменты директоры Наталья Кондратова билгеләп үткәнчә, проект мәктәп укучыларына уен форматында финанс грамотасын, командада эшләү күнекмәләрен һәм үз идеяләрен эксперлар каршында яклау сәләтен бирә. «Иң мөһиме – балалар чын тормышка якын эшлекле тәҗрибә ала. Бу аларга киләчәк һөнәри юлларын сайларга, ә кайберләре өчен үз бизнесын ачу өчен этәргеч көч булачак. Шундый алымнар ярдәмендә без республика икътисадының тотрыклы үсешен тәэмин итә алырлык яңа буын кадрлар резервын туплыйбыз», – диде ул.

Йомгаклау нәтиҗәләре буенча Минзәлә, Буа һәм Сарман районнары командалары өч төрле номинациядә җиңү яулады. Аларга «Сколково» инновацион үзәгенә һәм Мәскәүнең башка әйдәп баручы технологик мәйданчыкларына сәяхәткә юллама тапшырылды. Ә Җәлил бистәсендәге 2нче урта мәктәп белән Казанның 146нчы лицеен эшмәкәрлек күнекмәләрен үстерүгә юнәлтелгән махсус сертификатлар алды.

Искәртик, әлеге программа Татарстан Президенты йөкләмәсе буенча инде өченче ел рәттән гамәлгә ашырыла. 2022–2025 еллар дәвамында проектта 45 300 мәктәп укучысы катнашкан, шуларның 21 меңнән артыгы – авыл һәм кече шәһәрләрдә белем алучылар.

Татар-информ