KazanForum 2026: агроэкспорт һәм хәләл индустриясе үсешенә яңа этәргеч

«Россия – Ислам дөньясы: KazanForum 2026» XVII Халыкара икътисад форумы агросәнәгать тармагында халыкара хезмәттәшлекне ныгыту өчен нәтиҗәле мәйданчыкка әверелде. «Россиядә эшләнгән» сессиясе кысаларында илнең 9 төбәгеннән 80нән артык җитештерүче 21 чит ил вәкиле белән сөйләшүләр алып барды. 500дән артык бизнес-очрашу һәм нетворкинг сессияләре оешмаларга экспорт юнәлешендә яңа мөмкинлекләр ачты. Бу күрсәткечләр «Халыкара кооперация һәм экспорт» милли проекты бурычларын үтәүгә өлеш кертә, дип билгеләп үтте Татарстанның Авыл хуҗалыгы һәм азык-төлек министрлыгы.

Форумның мөһим өлеше булып «Казан Хәләл Маркет» күргәзмә-ярминкәсе торды. Анда 9 чит илдән һәм Россиянең 11 төбәгеннән 100дән артык компания катнашты, ә чараны 34 767 кеше зиярәт кылды. Бу платформа хәләл-продукциянең глобаль базардагы потенциалын күрсәтү һәм яңа партнерлык бәйләнешләре урнаштыру өчен уңай шартлар тудырды.

Чараны Татарстанның Авыл хуҗалыгы һәм азык-төлек министрлыгы, Эшмәкәрлеккә ярдәм фондының Экспортка ярдәм үзәге һәм «Агроэкспорт» оешмасы берлектә оештырды. Шулай ук илнең 8 төбәгеннән экспортка ярдәм күрсәтү үзәкләре кече һәм урта бизнес вәкилләренең актив катнашуын тәэмин итте.

Республикада хәләл индустриясен үстерү системалы рәвештә дәвам итә. 2025 ел нәтиҗәләре буенча Татарстанда 354,4 мең тонна хәләл-продукция җитештерелгән, аның гомуми кыйммәте 149,1 млрд сум тәшкил иткән. Авыл хуҗалыгы продукциясе экспорты $539,4 млн га җиткән, шуның $45 млн ы хәләл сегментка туры килә. 2026 елның апрель ае өчен экспорт күләме $122,4 млн тәшкил иткән, шул исәптән хәләл-экспорт — $8,3 млн.

Бүгенге көндә Татарстанда хәләл стандартларына туры килүче тотрыклы җитештерү челтәре формалашкан. Ул ит-сөт продукциясен, ярымфабрикатлар, икмәк-күмәч һәм кондитер әйберләрен, эчемлекләр һәм башка эшкәртелгән товарларны үз эченә ала. 30дан артык районда Татарстан Диния нәзарәтенең «Хәләл» комитеты белән берлектә сертификатлаштыру процессы җайга салынган.

Республиканың хәләл-продукциясе төп сатып алучылары булып БДБ илләре, Монголия, Бразилия, Гыйрак, Мисыр, Согуд Гарәбстаны һәм Берләшкән Гарәп Әмирлекләре тора.

Татар-информ