Татарстанда «Абилимпикс» чемпионаты: 1 700дән артык катнашучы һөнәри осталык сынашты

Татарстанда «Абилимпикс» төбәк чемпионаты йомгакланды. Бу чара инвалидлар һәм сәламәтлек мөмкинлекләре чикләнгән шәхесләрнең һөнәри осталыгын күрсәтү мәйданчыгына әверелде. Ярышларда гомуми саны 1 700гә якын кеше катнашты, шул исәптән 600гә якын конкурсант «Мәктәп укучылары», «Студентлар» һәм «Белгечләр» номинацияләрендә үз бәхетен сынады. Форум «Яшьләр һәм балалар» илкүләм проектының «Профессионалитет» федераль юнәлеше кысаларында оештырылды. Бу мәгълүматны Татарстанның Һөнәри компетенцияләрне үстерү үзәге матбугат хезмәте раслый.

Чара республиканың 14 муниципаль берәмлегендә урнашкан 35 белем бирү оешмасы нигезендә үтте. Катнашучылар 48 төп һәм 76 төбәк компетенциясе буенча ярышты. Аларның эшен 661 квалификацияле эксперт бәяләде, ә оештыру эшләрендә 620 волонтер ярдәм итте. Быелгы яңалыклар арасында — «Каш ясау остасы», «БПЛА эшләү һәм җыю», «Реклама белгече», «Социаль тернәкләндерү белгече» һәм «Техник‑протезист» кебек яңа юнәлешләр бар иде.

«Абилимпикс» хәрәкәтен үстерү үзәге җитәкчесе Адилә Исхакова сүзләренчә, быелгы чемпионат киң колачлы һәм нәтиҗәле узды. «Татарстан вәкилләре "Техник-протезист" кебек яңа компетенцияләрдә дә актив катнашты, бу юнәлешләр конкурсантлар өчен бик файдалы һәм кызыклы булды», — дип билгеләп үтте ул.

Чемпионат белән бергә 13–30 апрель көннәрендә «Мөмкинлекләр фестивале» дә үткәрелде. Аның кысаларында республиканың 12 муниципаль берәмлегендәге 13 махсус үзәктә үсешендә авырлыклары булган 500дән артык кеше төрле чараларда катнашты. Шулай ук Татарстанда беренче тапкыр мәктәпкәчә һәм башлангыч сыйныф яшендәге мөмкинлекләре чикле балалар өчен «Һөнәр белән танышу фестивале» оештырылды. 4 райондагы 5 мәгариф оешмасында 250дән артык бала 19 компетенция буенча уен форматында көч сынашты.

«Яшел хуҗалык хезмәткәре» номинациясендә җиңү яулаган Виктория Бокова үз тәэсирләре белән уртаклашты: «Мин чемпионатта беренче тапкыр катнашам. Озак һәм җаваплы рәвештә әзерләндем: төрле модульләр һәм биремнәр үтәдем. Нәтиҗәдә барысы да килеп чыкты, җиңүемә бик шатмын. Бу тәҗрибә миңа үземә ышаныч өстәде, алга таба үсәргә, бер урында тормаска дәрт бирде. Һөнәри үсешемдә остазымның роле бик зур», — дип сөйләде ул.

Татар-информ