Татарстанда 3,1 млн кв. метрдан артык торак файдалануга тапшырырга планлаштыралар

Торак төзелеше программаларын гамәлгә ашыруның барышы һәм планнары, гражданнарның аерым категорияләрен торак белән тәэмин итү, шулай ук социаль һәм инженерлык инфраструктурасы объектларын төзү турында ТР Төзелеш, архитектура һәм ТКХ министрының беренче урынбасары Дамир Шәйдуллин республика Хөкүмәте Йортында узган киңәшмәдә сөйләде.

2026 елда торак тапшыруның төп өлеше шәхси торак төзелешенә туры киләчәк — 1 млн 980 мең кв.метр. Күп фатирлы инвестицион торак сегментында 1 млн 45 мең кв. метр файдалануга тапшыру планлаштырыла. Социаль ипотека программасы буенча тагын 150 мең кв.метр каралган — бу Татарстанның 29 муниципаль районында 107 йорт.

Яңа елда республикада аерым категория гражданнарны торак белән тәэмин итү буенча дүрт программаны гамәлгә ашыру сакланып кала. Хәбәр ителгәнчә, ятим балалар арасыннан 641 кеше, биш һәм аннан да күбрәк балалы 21 күпбалалы гаилә, 61 яшь гаилә, шулай ук Ерак Төньяктан күчеп килергә мәҗбүр булган һәм радиация аварияләреннән зыян күргән өч гаилә торак алачак.

2026 елда ятим балаларны торак белән тәэмин итү өчен 52 күпфатирлы йортта 641 Торак урын алу каралган. Күп балалы гаиләләргә ярдәм итү программасы буенча муниципалитетларга 1 февральгә кадәр ТР Төзелеш министрлыгына гражданнарның исәп-хисап эшләренең актуальләштерелгән документларын тапшыру йөкләнде.

Моннан тыш, 2026 елда торак төзелешенә ярдәм итү чаралары күп балалы гаиләләргә бирелгән җир кишәрлекләре инфраструктурасын үстерүгә юнәлдерелгән бердәм республика программасы кысаларында гамәлгә ашырылачак. Программаны финанслау күләме 1 млрд сум тәшкил итәчәк. Акчаларны юллар һәм инженерлык коммуникацияләре төзелешенә юнәлтү планлаштырыла.