Әлмәт юлларында үлем очраклары ике тапкырга арткан — кем каны тамган?

Район башкарма комитетында узган юл хәрәкәте иминлеге комиссиясе утырышында игълан ителгән бу саннар чаң кага.

Узган елның шушы ук чоры белән чагыштырганда, юллардагы үлем очраклары нәкъ ике тапкырга (6 кешегә) арткан! Бигрәк тә саклану мөмкинлеге аз булган җәяүлеләр — авыл җирлекләрендәге өлкәннәр һәм каникул вакытында үзбәяле калган балалар зыян күрә.

Агымдагы елның 6 аенда Әлмәт районында теркәлгән иң авыр аварияләрнең зур өлеше төп трассаларга һәм авыл җирлекләренә туры килә. Комиссия утырышында аерым искәртелгәнчә, Түбән Мактама трассасында һәм шәһәр кырые урамнарында җәяүлеләрне таптату очраклары ешайган.

Мондый фаҗигаләрнең төп сәбәбе — авыл җирлекләрендә урамнарның тиешенчә яктыртылмавы яисә өлкән яшьтәге җәяүлеләрнең төнлә юл читеннән барганда киемнәрендә яктылыкны кайтаручы элементлар (фликерлар) бөтенләй булмавы. Төнге караңгылыкта, яңгырлы һавада күзлекле яки игътибары зәгыйфьләнгән өлкән кеше зур тизлектә килүче машина йөртүчегә бөтенләй күренми. Дәүләт автоинспекциясе кисәтә: авыл җирлегендә төнлә фликерсыз йөрү — үз-үзеңне үлемгә дучар итү белән бер!

Җәйге чорда комиссия аеруча зур борчылу белән балалар травматизмы мәсьәләсен күтәрде. Татарстан буенча ел башыннан бирле юлларда 6 баланың гомере өзелгән. Сабыйларның күбесе машина эчендә махсус креслога дөрес беркетелмәү яки бөтенләй куркынычсызлык каешларын каптырмау аркасында һәлак була.

Әмма бүгенге көндә Әлмәт районы авыллары өчен тагын бер зур афәт калыкты — бу яшүсмерләрнең питбайк, мопед һәм скутерларда чабуы. Ата-аналар үз балаларына правасыз һәм тиешле яшькә җитмәгән килеш әлеге куркыныч техниканы үзләре сатып алып бирә. Тәҗрибәсе һәм шлемы булмаган балалар авыл урамнарында, кыр юлларында югары тизлектә зур машиналар астына барып керә яки баганаларга бәрелә. Белеп торыгыз: балага кагыйдә бозып машина яки мопед йөртергә биргән өчен ата-аналарга 30 мең сум штраф салына, ә аннан да аянычы — бала гомере куркыныч астына куела.

Әлмәттәге үлем очракларының төп сәбәбе — тиешсез җирдә каршы як хәрәкәт полосасына чыгу. Колшәрип тимер юлы тирәсендәге һәм шәһәр урамнарындагы аварияләр нәкъ менә «Обгон тыела» билгесен санга сукмау аркасында килеп чыккан.

Шул ук вакытта яшь һәм яңа йөртүчеләрнең «кайнар канлылыгы» да зур роль уйный. Статистика буенча, ярты ел эчендә районда руль артына утыру стажлары 2 елдан да ким булган йөртүчеләр катнашында 113 авария очрагы теркәлгән, шуларның 72се нәкъ менә яшь йөртүчеләрнең үз гаебе белән булган.

Хөрмәтле өлкәннәр, авылда кич белән урамга чыкканда яктырткыч элементлар тагыгыз. Кадерле ата-аналар, балаларыгызны руль артына утыртмагыз, аларның җәен бәхетле һәм куркынычсыз итегез. Юл хатаны гафу итми.

Рәфкать Шаһиев 

Фото: нейрочелтәр