Яңа Нәдердә авылда эшләүче медицина хезмәткәрләре катнашында төбәк конференциясе узды

Чарада безнең районнан тыш Азнакай, Ютазы, Баулы, Бөгелмә, Лениногорск төбәге белгечләре дә катнашты. Сөйләшү гаиләне планлаштыру хакында барды. Республика Сәламәтлек саклау министрлыгы фельдшерлар советы рәисе Фәйрүзә Иделбаева көн кадагына куелган сорауны тикшерү өчен Әлмәт җирлегенә җыелуының тикмәгә булмавын искәртте. "Нәкъ менә биредә авыруларны профилактикалау, гаиләне планлаштыру, ФАПлар һәм шифаханәләр арасындагы тыгыз элемтә буенча зур тәҗрибә тупланган", - диде ул. Чыгышларның һәммәсе дә зур кызыксыну уятты. Миңлебай станциясе ФАП мөдире Рәсимә Зөбәйдуллинага ирешкән уңышлары өчен ТР шәфкать туташлары ассоциациясенең Мактау грамотасы тапшырылды.