Роспотребнадзор “Боярышник” сату буенча тыюны озайтты

Кулланучылар хокукларын яклау һәм кеше иминлеге өлкәсендә күзәтчелек федераль хезмәте (Роспотребнадзор) "Боярышник” – этил спиртлы сыекчаны, суррогатны сатудагы тыюны озайтты. Тиешле карарны Россия дәүләт баш санитар табибы Анна Попова имзалаган, дип хәбәр итә “Интерфакс”.

180 көн дәвамында “Боярышник”ны алып булмаячак. Бу - кешеләрнең аны эчеп, агулану очраклары күп булуы белән бәйле.

Шулай ук әзер продукциядә этил спирты 28 проценттан артканда, спиртлы һәм хуш исле өстәмәләрне сатарга ярамый. Бу - ваклап сату бәяләреннән түбәнрәк хакка сатыла торган аракыга һәм , гомумән, куәте 28 проценттан югары булган алкоголь продукциясенә кагыла.

Легаль булмаган сатуга контроль көчәйтеләчәк.

Искәртеп үтик, Иркутск шәһәрендә, метанол белән агуланып, берничә дистә кеше үлгәч, бу проблема кискен күтәрелде. Башлангыч мәгълүматлар буенча, алар барысы да “Боярышник” кулланган. Этикеткасында составында этанол барлыгы күрсәтелгән булса да, ул эчүдә кулланырга яраксыз метил спирты белән алыштырылган булган.

http://tatar-inform.tatar