Әлмәт төбәгендә ЮНЕСКО Глобаль геопаркын булдыру буенча стратегик сессия узды

Татарстанның көньяк-көнчыгышында ЮНЕСКО Глобаль геопаркын төзү концепциясен эшләүгә багышланган стратегик сессия Креатив процесслар фабрикасында уңышлы узды. Чарада авыл җирлекләре вәкилләре, район һәм шәһәр Башкарма комитеты җитәкчелеге, профильле идарәләр, муниципаль учреждениеләр, күзәтчелек органнары һәм иҗтимагый оешмалар җитәкчеләре катнашты.

Проектның уникальлеге нәрсәдә?

Проект җитәкчеләренең берсе, «ТатНИПИнефть» институтын үстерү буенча әйдәп баручы белгеч Владлена Сырвачева билгеләп үткәнчә:

«Бүгенге көндә дөньяда нефть тематикасына багышланган бер генә Геопарк та юк. Бу безнең проектның төп уникальлекләренең берсе».

Геопарк – ул уникаль геологик мирасны тере мәдәният, тарих һәм безнең төбәк өчен бик мөһим булган индустриаль елъязма белән берләштерүче бердәм территория. Мөһим аспект: геопарк булдыру авыл хуҗалыгына, инфраструктурага, туризмга, фәнгә һәм төбәк икътисадының нигезе булган нефть чыгаруга бернинди дә катгый чикләүләр кертми.

📍 Әлмәт районы – проектның йөрәге
Планлаштырылган территориядә югары халыкара кыйммәткә ия объектлар тупланган, һәм Әлмәт районы алар арасында үзенчәлекле урын алып тора:

Акташ карст күле – төбәк әһәмиятендәге уникаль табигать һәйкәле;

Кичуй авылындагы борынгы җир ныгытмасы– төбәкнең бай тарихын сөйләүче мөһим тарихи корылма.  
Бу объектлар булачак геопаркның экологик һәм тарихи йөзен билгеләүче төп нокталарның берсе булачак.

Гомуми территория һәм максатлар 
Проект чикләренә Бөгелмә һәм Лениногорск районнары тулысынча, ә Әлмәт, Чирмешән (Түбән Кама авыл җирлеге янындагы ныгытма һәм асфальт чыгу урыннары чикләрендә) һәм Сарман (Бакыр Тау тавы чикләрендә) районнары өлешчә керә. 

«Татнефть» компаниясе тарафыннан проектны гамәлгә ашыруга 2025 ел ахырында старт бирелде. Төп максат – дөнья дәрәҗәсендәге заманча фәнни-мәгариф, мәдәни һәм рекреацион кластер булдыру һәм киләчәктә аңа ЮНЕСКО Глобаль геопаркының рәсми статусын алу.

Белешмә өчен: Бүгенге көндә дөньяда 50 илдә ЮНЕСКОның 240 Глобаль геопаркы исәпләнә. Россиядә ЮНЕСКО статусына ике объект ия (икесе дә Башкортостанда: «Янган-Тау» һәм «Торатау»). Шулай ук федераль әһәмияттәге өч геопарк («Ундория», Алтай Республикасы, «Балтик-Ладога глинты») эшләп килә.

Алда – ЮНЕСКО статусын алу өчен масштаблы әзерлек. Администрация халыкны проектның гамәлгә ашыру этаплары белән таныштырып барачак һәм төбәкне үстерүдә актив катнашырга чакыра.