Үз акчаң — үз кулыңда: укучыларның җәйге хезмәте

Җәйге каникуллар — укучылар өчен озак көтелгән ял вакыты гына түгел, ә үз көчләре белән беренче адымнарны ясау, мөстәкыйльлеккә өйрәнү һәм үз кесә акчаларын эшләү мөмкинлеге дә.

Бүгенге көндә Әлмәт районында укучы яшьләрнең хезмәткә омтылышы бик зур. Район хакимияте һәм эш белән тәэмин итү үзәкләре моның өчен барлык шартларны тудырырга тырыша. Әмма кая мөрәҗәгать итәргә, нинди эшләр законлы һәм үсмер бала хезмәт хакыннан тыш нинди өстәмә түләүләр ала ала?

Әлмәт районында каникул чорларында үсмерләрне эшкә урнаштыру программасы киң колач алды. Рәсми мәгълүматларга караганда:

ªҖәйге чорда Әлмәттә 1250дән артык үсмер (14-17 яшь) рәсми рәвештә эшкә урнаштырыла.

ªМоның өчен республика бюджетыннан тыш, Әлмәт районының җирле казнасыннан да акча бүленеп бирелә. Бу акчалар аеруча кыен тормыш хәлендә калган яисә мәктәптә исәптә торган балаларны эшле итүгә юнәлтелә.

ªМоннан тыш, Әлмәтнең 5 шәхси һәм бюджеттан тыш эре ширкәте рәсми рәвештә укучылар өчен 182 өстәмә эш урыны булдырган.

Үсмер бала җәй көне алданусыз, рәсми хезмәт кенәгәсе (трудовая книжка) белән эшкә урнашсын өчен Әлмәт шәһәрендә түбәндәге ике төп дәүләт оешмасына мөрәҗәгать итәргә кирәк:

1. Әлмәт Халыкны эш белән тәэмин итү үзәге (Кадровый центр «Работа России»)

Кайда урнашкан: Әлмәт шәһәре, Герцен урамы, 86А йорты.

Элемтә телефоны: +7 (843) 222-05-57, +7 (8553) 32-34-90.

Нәрсә бирә: биредә укучылар рәсми төрдә хезмәт килешүе төзиләр. Иң мөһиме: эш бирүче түләгән хезмәт хакыннан тыш, Халыкны эш белән тәэмин итү үзәге балаларга дәүләт хисабыннан матди ярдәм (өстәмә акча) түли.

2. Әлмәт Яшьләр үзәге («Центр содействия молодежи»)

Нәрсә бирә: биредә яшьләр хезмәт отрядлары (яшьләр бригадалары) оештырыла. Балалар бер төркемгә берләшеп, зур коллектив булып, бик күңелле мохиттә үзләренә эш табалар. Быел гына да әлеге үзәк аша 240 тан артык Әлмәт үсмере кулына хезмәт кенәгәсе алачак.

Элек-электән укучылар өчен төп хезмәт төре булып физик эшләр саналса, бүген Әлмәттә сайлау мөмкинлеге шактый киң.

=Яшелләндерү һәм төзекләндерү. Укучыларның күпчелеге Әлмәт шәһәре һәм район авылларындагы паркларны, скверларны тәртиптә тота — чәчәкләр утырта, территорияләрне чүптән арындыра.

=Интеллектуаль һәм офис эшләре. Муниципаль оешмаларда, архивларда, мәктәп китапханәләрендә эш кәгазьләрен (документларны) барлау, компьютерда текстлар җыю кебек эшләр дә бар.

=Заманча креатив һөнәрләр. Әлмәт Халыкны эш белән тәэмин итү үзәге үткәргән махсус ярминкәләрдә (мәсәлән, «Территория роста» коворкингы нигезендә) балаларга копирайтер, графический дизайнер, веб-дизайнер һәм официант вакан-сияләре дә тәкъдим ителә башлады.

=Җәйге лагерьлар һәм җәмәгать туклануы.Эре ширкәтләр (мәсәлән, «Татнефть» лагерьлары яисә «Вкусно – и точка» челтәре) укучы яшьләрне ярдәмче хезмәткәрләр һәм аниматорлар итеп бик теләп эшкә ала.

Үсмерләрне эшкә урнаштырганда Россия Федерациясенең Хезмәт кодексы нигезендә катгый таләпләр үтәлергә тиеш:

1. Яшь чикләре. 14 яшьтән башлап эшкә урнашырга мөмкин, әмма моның өчен әти-әнинең (яки опекунның) язма рөхсәте кирәк.

2. Кискен чикләүләр. Балаларны авыр физик хезмәткә, зыянлы җитештерү урыннарына, төнге эшләргә (кичке 22:00 дән соң) җәлеп итү бөтенләй тыела.

3. Эш сәгатьләре. Җәйге каникул вакытында 14-15 яшьлек балалар көненә 4 сәгатьтән, 15-16 яшьлекләр 5 сәгатьтән, ә 16-17 яшьлек үсмерләр 7 сәгатьтән артык эшләргә тиеш түгел. Кагыйдә буларак, Әлмәттә укучыларны җәен көненә 3-4 сәгатькә генә эшкә җәлеп итәләр.

Хезмәт баланы мөстәкыйль итә, акчаның кадерен белергә өйрәтә. Балагыз каникулда вакытын бушка уздырырга теләми икән, югарыда күрсәтелгән адресларга мөрәҗәгать итеп, рәсми рәвештә эшкә урнашырга ярдәм итегез!

 Рәфкать Шаһиев

Фото: нейрочелтәр