Әлмәттә капиталь ремонттан соң муниципаль архивның яңа бинасы ачылды

Әлмәт муниципаль районы башкарма комитетының архив бүлегенең яңа бинасын ачу тантанасы булды. Күп еллар дәвамында Татарстанның көньяк-көнчыгыш тарихын саклаучы вазифасын башкаручы учреждение заманча йортка ия булды.  Хәзер архивның яңа бинасы Г.Тукай проспекты, 61нче йорт адресы буенча урнашкан. Эшләр "Муниципаль архивларга капиталь ремонт" республика программасы кысаларында башкарылды, бу «Тормыш өчен инфраструктура» милли проектының максатларына һәм бурычларына туры килә.

Аны ачу тантанасында Әлмәт муниципаль районы башлыгы Гүзәл Хәбетдинова һәм Татарстан Республикасының архив эше буенча дәүләт комитеты рәисе Гөлнара Габдрахманова катнашты.

"Капиталь ремонт һәм архивны яңа бинага күчерү килүчеләр өчен мөмкинлекләрнең киң спектрын ачачак һәм архив фондларын сыйфатлы саклауны тәэмин итәчәк", — дип ассызыклады район башлыгы.

Мөхтәрәм кунаклар яңартылган бинаны карадылар, комплексның җиһазланышын бәяләделәр һәм архивчылар коллективын истәлекле вакыйга белән котладылар.

Архивны урнаштыру өчен элеккеге ашханәнең аерым бинасы бүлеп бирелгән. Монда документларны норматив саклауның барлык заманча таләпләрен исәпкә алып капиталь ремонт ясалган. Яңа саклагычларда муниципаль архив фондлары һәм Әлмәт районы башкарма комитеты гамәлгә куйган муниципаль учреждениеләр архивлары урнаштырылган.

Бүгенге көндә архив бүлегендә 419 фондта бүленгән 84 меңнән артык саклау берәмлеге исәпләнә. Бу 1925 елдан 2023 елга кадәр Әлмәт районының сәяси, социаль-икътисадый һәм мәдәни үсешен чагылдырган даими саклау срогы документлары. Ябылган предприятиеләрнең документлары аеруча кыйммәтле, алар нигезендә архивистлар гражданнарның хезмәт эшчәнлеге турындагы белешмәләрне раслау буенча социаль әһәмиятле муниципаль хезмәтләр күрсәтәләр.

Нәкъ 70 ел инде Әлмәт архивы районның үткәне турында тарихи хәтерне саклауда төп үзәкләрнең берсе булып кала. Берничә буын белгечләр тырышлыгы белән предприятиеләр тормышы тарихының документаль материаллары бөртекләп җыелган һәм саклана, киң күләмле мәгълүмати потенциал булдырылган. Яңа бина кыйммәтле документаль материалларны ышанычлы саклауны тәэмин итеп кенә калмыйча, хезмәткәрләр һәм килүчеләр өчен уңайлы шартлар тудырырга да мөмкинлек бирәчәк.