Әлмәттә Бөек Ватан сугышы ветераннарын бәйрәм белән котладылар

Әлмәттә Бөек Ватан сугышы ветераннарын Яңа ел белән котладылар

Әлмәттә яшәүче Бөек Ватан сугышы ветераны Миңниса Сабирова янына шәһәр балалар хастаханәсе баш табибы урынбасары, шәһәр Советы депутаты Тамара Черемисина килде. Ул Миңниса Мифтах кызын  Яңа ел белән котлады, ветеранга бәхет, сәламәтлек, иминлек теләде.
Миңниса Сабирова Бөгелмә районының Карабаш бистәсендә хезмәткәр гаиләсендә туып үскән. Хезмәт юлын хисапчы булып башлый, әмма 1943 елда, 18 яшендә, фронтка алына. Көнбатыш фронтта механикалаштырылган тимер юл элемтәләренең 22 нче батальонының 8 нче төзелеш бригадасында, аннары Иркутск өлкәсендәге Слюдянка станциясендә хезмәт итә. 1945 елның ноябренә кадәр Икенче Белоруссия фронтында хәрби хәрәкәтләрдә катнаша. Җиңүне 20 яшендә каршылый. Сугыштан соң өенә кайта, бухгалтерлык курсларын тәмамлый һәм күп еллар бухгалтер һәм ревизор булып эшли. Ватан алдындагы казанышлары өчен II дәрәҗә Ватан сугышы ордены, «Германияне җиңгән өчен» медале, шулай ук Татарстан Республикасының «Фидакарь хезмәт өчен» медале белән бүләкләнә.
- Бу искиткеч кеше-безнең һәрберебез өчен үрнәк. Быел ул үзенең бер гасырлык юбилеен билгеләп үтте. Аңа «Татарстан Республикасы Әлмәт муниципаль районының Мактаулы гражданины» исеме бирелде. Миңниса Мифтаховнаның рухи көченә, аның энергиясенә һәм тормыш сөючәнлегенә һәрвакыт таң калам. Аның белән һәр очрашу-ул тере тарих белән очрашу. Аның истәлекләре бәяләп бетергесез, һәм безнең бурыч - аларны киләчәк буыннар өчен саклап калу, - дип билгеләп үтте Тамара Федоровна.