Ландыш Нигъмәтҗанова тормышыннан канәгатьме?

Хәер, әле дә җырчы җыелма концертларда катнашып йөри. Әйтик, бу көннәрдә ул Уфада узган "Өч артист" проектында катнашып кайткан.

- Ландыш, бу проектның авторы кем? Тамаша күңелле уздымы?

- Оештыручысы - Татарстанның халык артисты Айдар Галимов. Концертта Айдар Галимов, Данир Сабиров һәм мин катнаштык. Бик күңелле узды, Аллага шөкер, зал тулы булды. Халык бик җылы кабул итте. Ә аннан алдан "Өч артист"та Хәния Фәрхи, ИлСаф һәм Данир Сабиров катнашкан булган.

- Уфага тормыш иптәшең Фәрит белән баргансың. Ул һәркайда да сине озатып йөриме?

- Һәр җиргә дә бара алмый, билгеле. Әгәр ялы туры килсә, шимбә яки якшәмбе булса, бергә барабыз. Фәрит - минем таянычым, мөмкинлеге булганда, һәрвакыт янәшәмдә булырга тырыша.

- Ландыш, ТМТВ телеканалында "Шоубез" тапшыруын алып барасың. Алып баручы роле ошыймы үзеңә?

- Алып баручы минем өчен яңа һәм кызыклы һөнәр, бик ошый. Кайвакыт үзем дә яңалыкларны шуннан гына беләм.

- Якын арада кайларда чыгышларың көтелә?

- Яңа гына Чаллыдан кайттык. 31 гыйнварда Мәскәүгә театраль солянкага җыенабыз. Февраль, гомумән, концертларга бай булачак. Башкортстанда бик күп концертлар көтелә. (Интертат)