Әлмәт «Ак калфак» татар хатын-кызлары оешмасының күчмә утырышын кабул итте

Әлмәттә 15 һәм 16 октябрь көннәрендә Бөтендөнья татар конгрессының «Ак калфак» татар хатын-кызлары иҗтимагый оешмасының күчмә утырышы узды. Оешма җитәкчесе Кадрия Идрисова сөйләгәнчә, Әлмәттәге очрашу быел дүртенче һәм соңгы күчмә утырыш булды.

«Без Ризаэтдин Фәхретдин исемендәге гимназиядә булдык. Гимназиянең балаларга рухи-әхлакый тәрбия бирү тәҗрибәсе үрнәк булырга лаеклы. Без бу уку йортында ике сәгатьтән артык булдык, бик күп күңелле тәэсирләр алдык», - диде ул.

Очрашуда катнашучылар шулай ук музыка кораллары музеенда, мәчеттә һәм Ризаэтдин Фәхретдин исемендәге үзәктә булдылар. Алар шулай ук «Татнефть» компаниясенең хәйрия эшчәнлеге белән таныштылар. Форумның беренче көне Әлмәт татар дәүләт драма театрында пленар утырыш белән тәмамланды. Анда ТР Әлмәт районы башлыгы Тимур Нагуманов катнашты. Кадрия Идрисова оешманың Әлмәт бүлегенең нәтиҗәле эшчәнлеген билгеләп үтте.

«Без әлмәтлеләрнең татар халкы файдасына керткән зур өлешен һәм ихлас хезмәтен югары бәялибез. Бүген залда — Австралиядән, шулай ук Россиянең ун регионыннан "Ак калфак" оешмасы әгъзалары», - диде ул.