Әлмәткә - 70!

Әлмәт өчен 2023 ел юбилей даталары белән характерлана: Татарстанның нефть ятмаларын сәнәгый эшкәртүнең 80 еллыгы һәм Әлмәт шәһәренең 70 еллыгы.

Бу вакыйга уңаеннан 2 мартта Әлмәт туган якны өйрәнү музеенда шәһәрнең юбилеена багышланган түгәрәк өстәл утырышы узды. Анда фәнни хезмәткәрләр, туган якны өйрәнүчеләр, иҗтимагый оешма җитәкчеләре, хезмәт ветераннары, Әлмәт төзелеше һәм үсеше башлангычында торучылар катнашты.

Музей директоры Венера Зәйдуллина сүзләренчә, музей архивында шәһәргә багышланган 2000дән артык фотосурәт һәм тарихи фотосурәтләр саклана. Аларның кайберләренә карата датаны төгәлләргә кирәк.

Чараның максаты - төбәк кыйммәтләрен өйрәнү, тулыландыру һәм хәтта идентификацияләү, туган якның тарихи-мәдәни мирасын саклау эшендә берләшү өчен белемнәр белән уртаклашу. Яңартылган материал Әлмәт шәһәренең 70 еллыгына багышланган фотоальбом өчен кулланылачак.

Диалог форматында чарада катнашучылар шәһәр тарихы, аның истәлекле объектларын төзү, нефть башкаласы тормышы вакыйгалары белән бәйле кызыклы фактлар турында белемнәре белән уртаклаштылар.

Шунысын да билгеләп үтәргә кирәк, музей хезмәткәрләре тарафыннан туган якны өйрәнү буенча зур  эш алып барыла һәм җәмгыять белән мондый үзара хезмәттәшлек мәдәни тормышның иң әһәмиятле һәм актуаль өлкәләренең берсенә – туган якны өйрәнү өлкәсенә бәяләп бетергесез өлеш кертә. Музей коллективы бирелгән фотоматериаллар һәм экспонатлар өчен М. Я. Сөләймановка, А. М. Ивановка, Ш. Л. Таиповка, А. И. Зәйнуллинга, А. М. Вакатовага, М. Ш. Гарифуллинага, З. Г. Хәбиповага рәхмәт сүзләрен белдерә.

Туган як тарихын өйрәнү буенча тикшеренү һәм эзләү эшләрен активлаштыру максатыннан утырыш вакытында әлеге форматта чараны ай саен уздыру турында карар кабул ителде, дип хәбәр итә Әлмәт районы башлыгы матбугат хезмәте.

Фото: Әлмәт районы башлыгы матбугат хезмәте