Карлыганның файдасы

Карлыган җиләгендә В, Р, Е, А, С, К төркеменә караган витаминнар, фосфор кислотасы, шикәр, тимер һәм калий туп-ланган, яфраклары исә магний, марганец, көмеш, кургаш, бакыр, эфир майларына бай.

Кара карлыганда С витамины шулкадәр күп, организмны тәүлек буена җитәрлек дәрәҗәдә тукландыру өчен 20 җиләк ашап кую да җитә. Нәкъ менә шундый үзлеге өчен карлыганны дөрес туклану продукты буларак тәкъдим итәләр, чөнки ул төрле авырулар булганда организмны ныгыта һәм сәламәтләндерә, иммунитетны көчәйтә.

Бу җимеш йөрәк-кан тамырлары чир-ләренә, яман шешкә, Альцгеймер авыруына каршы профилактика чарасын үти. Аның бөер һәм бавыр, тын юллары, шикәр авыруларын булдырмаска ярдәм итүе дә ачыкланган.

Организмны тиз арада тернәкләндерергә сәләтле булганы өчен, карлыганны сытып әзерләнгән сокны операция кичергән һәм организмы хәлсезләнгән кешеләргә эчәргә киңәш итәләр. Ә менә җиләкләрне пешереп эчү югары кан басымын җайга салырга, азканлылыкны, гастритны җиңәргә булыша. Әгәр дә көчле ютәлдән интегәсез икән, кара карлыганның суын сыгып, аны шикәр һәм бал белән болгатып эчеп куегыз. Көчле антисептик булганга күрә, бераз су өстәлгән карлыган согы белән тамакны чайкату ангинадан котылырга да ярдәм итә.

Шунысы сөенечле: теләсә нинди халәттә дә бу җимеш үзенең барлык файдалы үзлекләрен саклап кала.

Карлыганның яфрагы җимешенә караганда да файдалырак. Шуңа күрә дә яфракларын төнәтеп эчәргә кушалар. Болай эшләгәндә ашказаны авыруларын гына җиңеп калмыйча, организмдагы зыянлы матдәләрне юып чыгарырга, матдәләр алмашы бозылса, аны да җайга салырга мөмкин. Төнәтмәне ясар өчен яңа гына өзелгән яки киптерелгән яфраклар кирәк. Әлбәттә инде, яңа гына өзелгәне әйбәтрәк. Кайнар суны әфлисун, алма яки гранат согы белән кушып, шушы катнашманы карлыган яфраклары өстенә салырга кирәк. Соңыннан өстен каплап, берничә көн төнәтергә һәм көнгә яртышар стакан эчәргә. Тире авырулары булган кешеләргә исә карлыган яфраклары төнәтмәсе кушып, ванна керергә киңәш итәләр.

Карлыганнан желе

Карлыган өлгерә башлаган чак. Шушы рецепт буенча желе эшләп карагыз! Бик тәмле килеп чыга.

Башта 13 стакан карлыганны яхшылап юасың, аннары шуңа ярты стакан су салып, 7 минут кайнатасың да газны минимумга куясың. Шуннан 13 стакан шикәр комы саласың һәм газны сүндермәгән килеш җәһәт-җәһәт кенә 3-4 минут болгатасың. Шуннан газны сүндереп куясың.

Желеда шикәр комы эреп бетсен өчен аны ара-тирә болгатып аласың. Менә шундый җайлы гына рецепт.

Карлыган желесын, капрон капкач белән ябыласы банкаларга тутырып, суыткычта сакларга киңәш ителә. Шушылай
саклаганда ул икенче уңышка кадәр тора ала.