Руслан Вильданов: "Әлмәттә телевизор караучылар кими"

Руслан да меңләгән әлмәтле кебек күн тупны әле бик кечкенә чакта ук тибә башлаган. Инде үсеп зур тормышка аяк атлагач та, әлеге шөгылен ташламаган, киресенчә, Әлмәттә футболны тагы да үстерергә үзеннән өлеш кертә. Моннан ике ел элек Руслан бездә һәвәскәрләр футбол лигасы оештыруга алына. Җәмәгать эшләрендә актив катнашкан егет өчен шундый оешма булдыру күптәнге хыял була. Әлмәт башкарма комитеты җитәкчелегенең әлеге идеяны куәтләп алуы исә Руслан кебек футбол дип янып йөргәннәргә зур бүләк була.

- Футбол дип бик күп егетләр дөньяларын онытырга мөмкин. Кемнең генә сабый чакта тезләрен ертып туп артыннан чапканы булмаган икән? Әлмәттә исә футбол яратучылар без уйлаганнан да күбрәк булып чыкты. Безнең лигада якынча 270 ләп кеше бар. Аларның 70 % ы - шәһәрнең эшче көче. Хезмәт көненнән соң бик еш шәһәр стадионына җыелып, футбол уйныйбыз. Төрле лигалар, ярышлар, чемпионатлар оештырабыз. Бу көздә генә Татарстанның көньяк-көнчыгыш районнары арасында ачык чемпионат булды, - ди 27 яшьлек егет.

Лиганың башка шәһәрләргә йөреп, зур ярышларда урыннар яулаганы да бар икән. Руслан фикеренчә, иң куандырганы - сәламәт яшәү рәвеше алып баручыларның артуы, ә эштән соң телевизор каршына кырын ятып эшсез ятучыларның елдан-ел кимүе. Билгеле, яшьләрнең тәмәке тартып, шөгыльсез урамда йөрүләренә караганда бирегә килеп мавыктыргыч уен белән кызыксынуы күпкә яхшырак.

Филүзә Хәмидуллина

• Әлмәттә футболның киң колач җәеп, чәчәк ата башлавына әллә ни күп вакыт узмады әле. Нефтьчеләр төбәгендә бу спорт төрен җәелдерү буенча зур эш 2000 елда башлана. Шул елда ук Әлмәттә футбол командасы тупланып, физкультурачылар коллективлары арасында узган Россия беренчелегендә безнекеләр беренче урынга чыга һәм "Урал-Идел буе" зонасында икенче лига ярышында катнашу хокукына ия була. Шулай ук профессиональ команда өчен футболчылар әзерләү максаты белән команда каршында балалар һәм яшүсмерләр спорт мәктәбе эшли башлый. 2009 елда финанс авырлыклары аркасында "Алнас" футбол командасы үз эшен туктата. Әмма завод һәм район җитәкчелеге ярдәме белән тренировка базасын саклап калу мөмкин була. Шулай итеп үзәк футбол буенча балалар һәм яшүсмерләр спорты мәктәбенә әйләнә

• Әлмәт шәһәр стадионы 7 гектар мәйданны били һәм Татарстанның көньяк-көнчыгышында йөзләгән кеше ел әйләнәсе футбол белән шөгыльләнә ала торган бердәнбер урын санала. Табигый үлән белән ясалган ике кырда автоматик су сибү, җылыту системалары булдырылган. Трибуналарда урыннар саны 7000 гә җитә. Шуңа да биредә төрле дәрәҗәдәге зур ярышларны уздырып була. Ә универсаль спорт манежы төрле дәрәҗәдәге уеннарны уздырырга мөмкинлек бирә.