Әлмәт өлкәннәре авырудан качу юлын тапкан (+ ФОТОЛАР)

Ул лаеклы ялдагылар өчен спорт бәйрәменә әверелде. Кул эшләреннән күргәзмә, үзешчәннәр чыгышы, медицина профилактикасы үзәге оештырган фиточәй, кан басымын үлчәүләре - барысы да һәркемнең күңеленә хуш килде. Башта дүртенче спартакиадага йомгак ясалды, активистларга Мактау грамоталары, Рәхмәт хатлары тапшырылды. Пенсия фонды идарәсе дә махсус бүләк әзерләгән булып чыкты. Узган спартакиаданың җиңүчесе булып "Әлмәтнефть" идарәсе ветераннары танылды. Бу көнне өлкәннәр алга иелү буенча ГТО нормасын да тапшырды. Пенсионерлар шат, кайсы белән генә сөйләшмә, спорт белән шөгыльләнә башлагач сырхауларының юкка чыгуын әйтә.