Әлмәттә үтерүчегә хөкем карары чыгарылган

Әлмәт шәһәре прокуратурасы 45 яшьлек ир-атка карата җинаять эше буенча гаепләүне хуплады.

Суд аны РФ Җинаять кодексының 105 нче маддәсенең 1 нче өлеше буенча («Кеше үтерү, ягъни аңлы рәвештә башка кешегә үлем китерү») җинаять кылуда гаепле дип тапкан.

Судта 2020 елның 17 июлендә төнлә Гафиятуллин урамындагы күпфатирлы йортларның берсендә хөкем ителүче һәм зыян күрүченең сугышканнары ачыкланган. Аннан соң беренчесе "оппонент"ка җәза бирергә карар кыла. Җинаятьчел ниятне тормышка ашыру өчен хөкем ителүче өенә кереп, пычак белән кораллана һәм ыгы-зыгы купкан урынга әйләнеп кайтып, әлмәтленең тормыш өчен мөһим органнарына пычак белән һөҗүм итә: күкрәк читлеге, корсак, арка, муен, уң кулын яралый. Зыян күрүче һәлакәт урынында алган тән җәрәхәтләреннән үлә.

Элегрәк хөкем ителүче берничә тапкыр җинаять җаваплылыгына тартылган, хөкем ителгән булган. Суд утырышы барышында ул өлешчә гаебен таныган һәм пычак белән һөҗүм итүне кирәкле саклану чикләреннән артып китүен әйткән.

Суд карары нигезендә, иргә 10 елга ирегеннән мәхрүм итү һәм катгый режимлы төзәтү колониясенә җәза бирү каралган.