Әлмәттә арбалет ярдәмендә колониягә наркотиклар кертергә теләгән ир-атны хөкем иттеләр

Узган елның җәендә хөкем ителүченең, алдан килешү буенча бер төркем затлар белән эш итеп, тикшерү барышында ачыкланмаган зат белән бергә 8 нче төзәтү колониясенә таксида килүе ачыкланган. Машинадан чыккач, егет арбалетны тартып ала һәм учреждениенең коймасына ата. Укка скотч ярдәмендә 86,70 граммлы наркотик матдә беркетелгән булган. Егетне шунда ук колония хезмәткәрләре тоткарлый. Соңрак полицейскийлар тагын шундый ике ук тапкан: берсе — автомобиль салонында, икенчесе — 8 нче төзәтү колониясе территориясендә. Суд-химия экспертизасы нәтиҗәләре буенча, табылган наркотикның гомуми авырлыгы 128,11 грамм тәшкил иткән, бу зур күләмне аңлата.

Прокурор ярдәмчесе Линар Ибраһимов хәбәр иткәнчә, хөкем ителүче элек җинаять җаваплылыгына тартылмаган. Ул үз гаебен танымаган, әмма аның барлык дәлилләре дә эш буенча җыелган дәлилләрне кире каккан. Суд Чаллы кешесен бер төркем затлар тарафыннан алдан килешеп, наркотик матдәләрне законсыз сатарга омтылуда гаепле дип тапкан. Аңа каты режимлы төзәтү колониясендә җәза үтәп, 6 елга ирегеннән мәхрүм итү рәвешендә җәза билгеләнгән.