Әлмәттә халыкара үсемлекләрне саклау көнен билгеләп үттеләр

Яраннар, петунияләр һәм башка бик күп чәчәкләр тиздән шәһәр клумбаларында барлыкка киләчәк. Яшьләр үзәгендә яшүсмерләр клублары, планетарий һәм активистлар халыкара үсемлекләрне яклау көнен чәчәкләр утырту белән билгеләп үттеләр.

"Чәчәк ат, минем нефть шәһәре" акциясенә ныклап әзерләнделәр. Яшьләр үзәге директоры Айдар Газизуллин җитәкчелегендә катнашучылар 50 яран, шулай ук  петуния һәм башка чәчәк үсентеләре утырттылар. Алга таба чәчәкләрне шәһәр клумбаларына күчерәчәкләр.

Барысы да тиешенчә-торф чүлмәкләренә грунт салганнар, орлыклар чәчкәннәр яки үсентеләр утыртканнар, су сипкәннәр.

Барлык катнашучылар өчен дә мәтрүшкә, бөтнек, карлыган яфракларыннан үлән чәе белән фитобар оештырылды. Бу үләннәрне Әлмәт районы территориясендә яшьләр үзәге хезмәткәрләре җыя.