Кызлар һәм малайлар лагерьда Коръән укыган һәм ятлаган, азан әйткән, яңа гарәп сүзләрен өйрәнгән.
Әлмәт мәдрәсәсе каршындагы рухи-сәламәтләндерү үзәге үз эшен тәмамлады. Биредә җәй дәвамында ике сменада Әлмәт һәм Татарстанның башка шәһәр-районыннан 200 бала ял иткән. Бу хакта Татартан Мөселманнарының Диния нәзарәте сайтында хәбәр ителә.
Балаларның һәр көне вакыйгаларга һәм истәлекләргә бай булган: кызлар һәм малайлар Коръән укыган һәм ятлаган, азан әйткән, яңа гарәп сүзләрен өйрәнгән. Күңел ачу чараларына да вакыт табылган: ял итүчеләр спорт ярышлары, футбол, җитез уеннар һәм эстафетларда, кул эшләре буенча мастер-классларда, сабын куыклары тамашасында бик яратып катнашкан. 65 нче янгын сүндерү бүлегенә экскурсия дә балаларда зур кызыксыну уяткан.
Ялның бер көне Татарстан нефтенең 60 еллыгы исемендәге шәһәр паркында узган: биредә малайлар-кызлар мини-зоопаркны караган, кинотеатрда булган. Саубуллашу көнендә ярминкә оештырылган һәм Коръән сүрәләрен иң күп белүчеләр өчен бүләкләр тапшырылган.