Су-25 штурмовигын торак пункттан читкә алып китеп, йөзләрчә кешене коткарган Әлмәт егетенең исеме мәңгеләштерелде

Лачындай ир-атларыбыз ил дәшкән чагында һәрвакыт каһарманлык үрнәге күрсәткәннәр. Герой-пилот яшәгән йорт диварына куелган әлеге истәлек тактасы — үсеп килүче яшь буын өчен Ватанга тугрылыкның кабатланмас үрнәге, ачык йөзле Әлмәт егетенең мәңгелеккә күчкән якты истәлеге булып тора.

Азов диңгезе өстендәге дәһшәт

Фаҗига моннан өч ел элек, 2023 елның 17 июлендә Краснодар краендагы Ейск шәһәре янында килеп чыга. Хәрби очучы Тимур Хисмәтуллин Су-25 штурмовигында планлы өйрәнү очышын башкара. Тәҗрибәле пилот һава лайнерын аэродромга таба юнәлткәндә, көтелмәгән техник авария аркасында очкычның ике двигателе дә берьюлы эштән чыга.

Су-25 штурмовигы тизлекне югалтып, турыдан-туры торак пункт өстенә түбәнәя башлый. Шул шомлы минутларда яшь очучы бер генә секундка да каушап калмый. Үз иминлегеннән бигрәк җирдәге йөзләрчә тыныч халыкның гомерен уйлап, ул идарә ителмәүче хәрби машинаны шәһәр читенә — Азов диңгезе акваториясенә таба борырга карар кыла.

Очкычны кешеләр яшәми торган куркынычсыз зонага алып чыккач кына, бик түбән биеклектә катапультироваться итә. Самолет суга килеп төшә. Ни кызганыч, бәрелү көче искиткеч зур булу сәбәпле, кыю пилотның ике аягы да сына, каты җәрәхәтләр алган солдат су астына китеп, батып үлә. Үз өстенә килгән үлемне кабул итеп, яшь егет бөтен бер шәһәрне зур һәлакәттән саклап кала.

Батырлык ордены кавалеры

Хәрби бурычын үтәгәндә күрсәткән фидакарьлеге, батырлыгы һәм каһарманлыгы өчен Россия Федерациясе Президенты Указы белән пилот Тимур Хисмәтуллин үлгәннән соң Батырлык ордены белән бүләкләнә.

Тантаналы чарада ҡатнашкан һәркем Тимурның тормышта һәрвакыт игелекле, ярдәмчел, шат күңелле һәм тирә-юньдәгеләргә карата искиткеч ачык йөзле булуын искә алды. Очучы булу аның балачактан ук килгән олы хыялы була, һәм ул бу максатына чын ир-атларча ирешә.

Мемориаль тактаны ачу тантанасына килүчеләрнең күзендә яшь иде. Хәтер митингына геройның әти-әнисе, якын туганнары, шәһәр хакимияте вәкилләре, Әлмәт районының хәрби комиссары, «Боевое братство» ветераннар берләшмәсе әгъзалары һәм очучының язмышына битараф булмаган бик күп шәһәр халкы җыелды.

Җыелучылар Тимур Хис-мәтуллинны бер минутлык тынлык белән искә алдылар. Мемориаль тактага кайнар хисләрне чагылдырган кызыл канәферләр һәм тере чәчәк бәйләмнәре куелды.

Исеме күкләргә язылган Әлмәт улы  шәһәребез тарихында мәңгегә калачак.