Әлмәт кырларында 3,7 мең гектардан артык печән чабылган, сенаж әзерләү 94 процентка җиткән

Әлмәт районында терлек азыгы әзерләү кампаниясе кызу темпларда дәвам итә.

Район авыл хуҗалыгы һәм азык-төлек идарәсенең 2026 елның 15 июленә булган рәсми хисабы кырларда зур эш башкарылганын күрсәтә. Район буенча урак өсте эшләре уртача 64 процентка үтәлгән, ә кайбер алдынгы хуҗалыклар һәм КФХ берләшмәләре планнарын 100 процентка тутырып, кышка ныклы нигез салган. Хәбәрчебез район авыл хуҗалыгы ида-рәсеннән алынган иң соңгы рәсми саннарны барлады.

Оператив статистика: 15 июльгә Әлмәт кырларындагы төгәл саннар

Район күрсәткечләре Әлмәт аграрийларының зур оешканлык белән эшләвен раслый:

ª Чабылган мәйданнар: район буенча барлыгы 3759 гектар мәйданда печән, 1712 гектарда сенаж өчен үлән чабылган. Тагын 100 гектар яшел азык буларак әзерләнгән.

ª Печән запасы: бүгенге көнгә районда барлыгы 2325 тонна печән әзерләнгән (бу планның 66,3 процентын тәшкил итә). Бер баш шартлы терлеккә уртача 2,6 центнер азык берәмлеге туры килә.

ª Сенаж кампаниясе — финишка якын: районда сенаж салу иң югары темпларда бара — планлаштырылган 10901 тоннаның 10209 тоннасы инде траншеяларга салынган. Бу — планның 94 проценты дигән сүз.

Алдынгылар һәм төп нәтиҗәләр

Бирелгән мәгълүматлардан күренгәнчә, районда берничә төркем хуҗалык аерылып тора:

1.Крестьян-фермер ху-җалыклары (КФХ) — печән әзерләү буенча рекордчылар:

Районның барлык КФХ берләшмәләре бергәләп 1725 гектарда печән чапкан һәм 700 тонна печән туплап, үз планнарын 107,4 процентка үтәгән.

2. Сенаж батырлары — Токарликов ис. һәм «Кичүчат»:

Токарликов ис. АҖ сенаж кырларында иң күп эш башкарган: 947 гектардан үлән җыеп, барлыгы 5506 тонна сыйфатлы сенаж салган (планның 92 проценты).

«Кичүчат» ҖЧҖ исә сенаж планын арттырып үтәгән: планлаштырылган 3168 тонна урынына 3200 тонна сенаж әзерләгән (101 процент). Бер баш шартлы терлеккә туры килгән азык берәмлеге күрсәткече буенча да алар районда алда бара — 11,7 ц.

3. Планны 100%ка үтәүчеләр:

«Чагылтау», «Аппак», «Актау», «Чишмә», «Союз-Агро», «Ташкичү» хуҗалыклары печән чабу эшләрен 100 процентка төгәлләгәннәр. Ат спорт клубы да үз планын 102,2 процентка үтәп, 750 тонна печән җыйган.

Шәхси ярдәмче хуҗалыклар (ЛПХ) да игътибар үзәгендә

Районда халыкның шәхси мал-туарын кышлату мәсьәләсе дә җитди карала. Мәгълүматлар буенча, ЛПХ (личные подсобные хозяйства) өчен барлыгы 6265 тонна печән әзерләнгән, бу халык планының 73 процент-ын тәшкил итә һәм ул авылларда яшәүче гаиләләрнең кыш көне мал азыгыннан кытлык күрмәячәгенә өмет бирә.

Кукуруз һәм берьеллык үләннәр

Хәзерге вакытта аграрийлар эшләрнең беренче этабын тәмамлап, киләсе этапны планлаштыра. Район буенча алда әле 600 гектар мәйдандагы кукуруз силос өчен эшкәртеләчәк (шуның 500 гектары — Токарликов ис. хуҗалыкта, 100 гектары — «Кичүчат»та). Тиздән берьеллык үләннәрне чабуга да тулы куәткә керешәчәкләр — барлыгы 1131 гектар мәйданның 361е чабылган инде.

15 июльгә булган бу коры саннар артында авыл хезмәтчәннәренең авыр һәм фидакарь хезмәте тора. Район газетасы коллективы исеменнән кыр эшчәннәренә калган планнарны да уңышлы тәмамлап, кышка зур әзерлек, җитәрлек күләмдә тупланган  терлек азыгы белән керүләрен телибез!

 Рәфкать Шаһиев