ТР авыл хуҗалыгы һәм азык-төлек министрлыгы: Татарстан кирәкле шикәр һәм май күләме белән тәэмин ителгән

"Шикәр белән тәэмин ителеш 356,9% тәшкил итә, ягъни кирәкле күләмнән өч тапкыр күбрәк. Көнбагыш мае буенча һәр татарстанлы 12 тапкырдан артык тәэмин ителгән, тәэмин ителеш – 1269,6%", – дип билгеләп үттеләр министрлыкта.

Ведомствода аңлатуларынча, исәпләү өчен бер кешегә азык-төлек куллануның уртача нормалары алынган. Бу күрсәткечләр бер кешегә 24 кг шикәр комы һәм 12 кг май туры итә.

Татарстанда ел саен 331,9 мең тонна шикәр комы җитештерелә, халык ихтыяҗы - 93 мең тонна. Көнбагыш мае җитештерү елына 584 мең тонна тәшкил итә, ә ихтыяҗ – 46 мең тонна.

"Майлы культуралар һәм шикәр чөгендере чәчүлекләрен, шулай ук аларны җитештерү күләмнәрен кыскарту планлаштырылмый",-дип ышандырдылар матбугат хезмәтендә.