Әлмәттә Чернобыль фаҗигасен искә алдылар [+ФОТОЛАР]

Аның нәтиҗәләрен бетерүдә катнашкан әлмәтлеләр, аларның гаиләләре бүген янәдән Хәтер мәйданына җыелды. 
Әлмәт районыннан авария нәтиҗәләрен бетерергә 172 кеше китә. Хәзерге вакытта районда Чернобыль вакыйгасында катнашкан 110 кеше яши. Араларында инвалид калучылар да бар. Каһарманлыклары өчен күбесе орден-медальләр белән бүләкләнгән. Шулай ук ирләре вафат булган 33 тол исәпләнә. Алар да ел саен митингка килә. 
Район башкарма комитеты җитәкчесенең социаль мәсьәләләр буенча урынбасары вазифаларын башкаручы Светлана Лаптева митингта ясаган чыгышында төбәктә «чернобыль»челәрне социаль яклау буенча максатчан эш алып барылуын билгеләп үтте, актив эшчәнлеге белән 20 елдан артык куандырган «Союз Чернобыль» иҗтимагый оешмасының Әлмәт бүлегенә рәхмәт сүзләре дә җиткерелде. 
Шәһәр һәм районның хәрби комиссары урынбасары Нәфис Гыйззәтуллин да –ул елларның шаһиты. 
– Бөтен ил ярдәм итәргә алынды. Кешеләр хәрби комиссариатлар аша чакырылды. Бу фаҗига күп кенә язмышларны сындырды, анда булучылар сәламәтлекләрен югалтты. Шуның аркасында кайберәүләр тормышта ниндидер уңышка ирешә, хыялларын тормышка да ашыра алмагандыр. Ничек кенә булса да, Ватан чакыруына каршы килүче, «бармыйм» диюче булмады. Халык бу юлы да бердәмлеген күрсәтте. Рәхмәт сезгә, – диде ул. «Союз Чернобыль» иҗтимагый оешмасының Әлмәт бүлеге җитәкчесе Роберт Никитинның да чыгышы рәхмәт сүзләре белән сугарылган иде. Ул муниципалитет, социаль яклау идарәсе, оешма-предприятиеләрнең теләктәшлеген тоеп яшәүләрен искәртте. 
Арабызда булмаганнар бер минут тынлык белән искә алынды. 
Хәтер мәйданындагы һәйкәлләргә эз суынмый. Биредә чәчәкләрне даими күрергә була. «Чернобыль»челәр истәлегенә куелган стелла да бүген кызыл канәферләргә күмелде. Кадетлар, укучылар, студентлар, иҗтимагый оешмалар, дин әһелләре – һәммәсе бердәм булып стелла каршына килеп якташларыбызга хөрмәт хисләрен, батырлыкның онытылмавын белдерде. 

Илдар Сираев: 
– Мин Чернобыльдә булган авария нәтиҗәләрен бетерүдә 1989 елда катнаштым. 3 елга якын вакыт узса да, биредә коточкыч фаҗига булуы күренә иде. Авылларда да, станциядә дә эшләдек. Хәрабәләрне зур тирән чокырлар казып, шунда күмдек. Торак пунктлардан өлкәннәр безнең янга килеп, каплы сөт сорыйлар иде. Әлмәттән бергә баручылар да булды. Беребез хәзер мәрхүм инде. Ел саен митингка киләм, тормыш иптәшем белән һәйкәлгә чәчәкләр куябыз. Иң зур теләгебез: мондый фаҗигаләр кабатланмасын, тыныч тормышта яшәргә язсын!