Аш серкәсе зарарсызландыра
Ит турау өчен тәгаенләнгән агач такталарны зарарсызландыруның бернинди кыенлыгы да юк. Моның өчен аларны су кушылмаган аш серкәсе белән сөртеп алырга кирәк. Аш серкәсе сальмонелла һәм стафилоккок кебек зарарлы микробларны үтерә.
Әлеге максатларда агачтан эшләнгән турау такталарына бераз чәй содасы сибәргә, ә аннары аш серкәсе бөркергә мөмкин. Аш серкәсе тәэсирендә чәй содасы чыжылдап күбекләнер. 5-10 минуттан такталарны салкын суда чылатылган чүпрәк белән сөртеп алыгыз.
Аш серкәсенең майга каршы көрәштә кулланылуы һәр пешекчегә мәгълүм. Ул хәтта калын май катламы белән капланган өслекләрне, мәсәлән, казаннарны да яхшы чистарта.
Ризык кыздырганнан соң май чәчрәгән урыннарны аш серкәсе тамызылган чүпрәк белән юыгыз да йомшак чүпрәк белән корытып алыгыз.
Савыт-саба юу сыекчасына 3-4 аш кашыгы серкә кушып болгатыгыз. Ул сыекчаның чистарту үзлеген яхшырта, нәтиҗәдә сыекча да азрак исраф ителә.
Тутыкмый торган корычтан ясалган савыт-сабага ябышкан ризыктан һәм майдан арыну өчен кәстрүлгә табалар күмелерлек итеп су салыгыз һәм, 200 миллилитр аш серкәсе өстәп, 5 минут кайнатып алыгыз.
Следите за самым важным и интересным в Telegram-каналеТатмедиа