Әлмәттә хезмәт ветеранын 100 яшьлек юбилее белән котладылар

Әлеге вакыйга киң җәмәгатьчелек игътибарыннан да читтә калмады. Юбилярны туган көне белән котларга килгән район башлыгы Зәрига әбигә Россия Президентының котлавын һәм истәлекле бүләк тапшырды. Көчле рухлы, намуслы - якыннары аны шулай бәяли. Зәрига әби үзен бәхетле һәм бай кеше ди. Аның 9 оныгы, 9 оныкчыгы бар. Өлкән яшьтә булуына да карамастан, биш вакыт намазын калдырмый, уразасын тота. Аның яу кырында мәңгелеккә ятып калган яшь егетләр, дөнья тәртәсе ир-атлар, ятимнәр өчен сыкрану белән тулы бәетләр иҗат итүе дә билгеле. Йөзьяшәр якташыбыз "сәламәт тормыш алып барырга, намус кушканча яшәргә һәм эшләргә, күңел төшенкелегенә бирелмәскә" чакыра.

Фотолар Әлмәт муниципаль районы сайтыннан алынды