Бизәнмәсәм, ирем ташлап китә...

Наҗия белән моннан ике ел элек таныштык. Улларыбыз бер бакчага йөри. Иртә-кич очрашкач, сөйләшергә дә җай чыга. Наҗия булачак ире Тимур белән югары уку йортында укыганда танышкан. Студент чакта ук өйләнешкәннәр. Тимур хәлле гаиләдән. "Чибәр булсаң, тормышың да шәп була", - ди На­җия үзе турында. Иренең әти-әнисе яшьләргә туйда өч бүлмәле фатир бүләк иткән. Өйгә йорт җиһазлары, көнкүреш техникасы сатып алу мәсьәләсен дә алдан ук кайгыртып куйганнар. Вузны тәмамлагач, яшьләр бәби алып кайтырга уйлый. Тик сабый тугач Тимурның үз-үзен тотышы үзгәрә. Ир-ат эштән кайтырга ашыкмый, гомумән, кайтмыйча калган көннәре дә булгалый. Өйдә тавыш чыга башлагач, Тимур читтә чуалып йөри торган хатыны бар икәнен сөйләп бирә. "Тәмам өйдәге хезмәтчегә әйләнеп беттең, көзгегә күтәрелеп тә ка­рамыйсың, бертөрлелек туйдырды", - дип сү­геп ташлый ир хатынын. Наҗиягә шул җитә кала...

Яшь, чибәр булу дустымның тор­мыш максатына әйләнде. Бу хәлләрдән соң Наҗия икенче көнне үк матурлык салонына юл тота. Соң­гы ярты ел эчендә ул ясаткан яшәрү процедураларын санап бетерерлек тә түгел. Җилкәгә кадәр җиткән чәчен биленә кадәр "үс­тер­де", керфекләрен табигый бөдрә­лән­дерде, күз тирәсендәге җыер­чык­ларны бетерде, нечкә булып тоелган иреннәрен калынайтты... "Иң беренче матурлык салонына килеп кергәч тә, керфекләрне генә бөд­рәләндерермен дигән идем, кашларымны да тигезләп, ике атнага кадәр юылмый торган буяу белән буярга тәкъдим иттеләр. Ризалаштым. Әлеге хезмәт өчен өч мең сум акча түләдем. Нәтиҗәсе бик ошады. Икенче юлы иреннәрне калынайтырга бардым. Бәясе алты мең сум тора. Әлеге процедураны үзеңә кирәк кадәр ай саен кабатларга мөмкин. Үзгәрешләрне ирем дә сизде, ахры. Балам белән синнән башка беркем дә кирәкми, дип гафу үтенде", - ди Наҗия. Хәзер ясалма матурлык турында дустымнан да күбрәк белүче юктыр, мөгаен. Аның әйтүенчә, ясалма матурлык белән бер мавыга башлаган кеше гомумән аннан башка яши алмый. Ә көзгедә кимчелекләр көн саен табылып кына тора.

Шәһәрдә матурлык салоны эзләп ерак йөрисе дә юк. Әлеге өлкәдә акча эшләүчеләр арасында үзләре яшәгән фатирда ук хезмәт күрсәтүчеләр күп. Арада иң таралганы - тырнак үстерүдер, мөгаен. Елена Тимофеева ике елдан бирле бизнес белән шөгыль­ләнә. "Балага бер яшь тулгач, тырнак үстерү белән чын-чынлап шөгыльләнергә булдым. Махсус курслар тәмамла­дым. Башта клиентларны залда гади өстәл янында гына кабул итә идем. Эш җай­лашкач, йокы бүлмә­сен махсус җиһазландырдык. Тырнак үстерү уртача 650-700 сум тора. Көненә өч клиент кабул итәм, кечкенә балам да бар бит әле. Миңа ике атна алдан язылып куялар. Арада ир-атлар да очрый", - ди Елена Тимофеева. Иң мөһиме, кулларны җил­дән, салкыннан сак­ларга кирәк. Тырнаклар ныграк булсын өчен аларны 5-10 минутка җылытылган кастор яки зәйтүн маена тыгып торырга киңәш ителә. Әлеге процедураны ким ди­гәндә атнага бер тапкыр кабатларга кирәк, ди.

"Чәчем матур булсын дип теләү­челәр дә күп, - ди башкаладагы матурлык салоннарының берсендә эшләүче Гөлнара Касыймова. - Чәчне ясалма рәвештә үс­тергән вакытта берничә төрле технология кулланыла. Шул исәптән салкын, кайнар, японча кебекләре дә бар. Бәясе чәчнең озынлыгына һәм калынлыгына бәйле. Бер процедура уртача 8-10 мең сумга төшә. Ботокс чәчнең төсен ялтырата, толымнарны тагын да калынайта".

Соңгы арада мөслимәләр өчен махсус матурлык салоннарын да очратырга мөмкин. "Ясалма матурлык ул ислам динендә тыела, дип фикер йөртүчеләр бар. Мин моның белән килешмим. Һәркем матурлыкка омтылырга тиеш. Ирең янында чибәр, сылу булып күренү - аңа ошавыңа ышанычны тагын да арттыра. Массаж, биткә төрле мас­калар ясау кебек сәламәтлән­де­рүгә юнәлдерелгән процедуралар тыелмый. Ә менә пластик операция ярдәмендә кимчелекләрне төзә­тер­гә тырышу хәрам булып санала. Аллаһы Тәгалә сине ничек яраткан, шуңа риза булып яшәргә кирәк", - ди Гөлназ Галиева.

Балалар бакчасыннан кайтканда Наҗияне тагын очраттым. Бу юлы матурлык салонына барып, бит яңакларын кызарткан. "Соңгы арада ирем тагын эштә тоткарлана башлады, әллә кредитка акча алып, пластик операция ясатырга инде", - ди ул. Матур башка акыл да кирәк шул...

Эльвира ВӘЛИЕВА

http://vatantat.ru/