«Мәдәният» илкүләм проекты нәтиҗәсендә Әлмәттә модель китапханә ачылды

2022 елда Татарстанда «Мәдәният» илкүләм проектын гамәлгә ашыруга гомумән алганда 1,2 миллиард сумнан артык юнәлдерелгән, шул исәптән: федераль бюджеттан – 700,3 миллион сумга якын һәм 457 миллион сумнан артыгы – республика бюджетыннан. Бу хакта ТР Мәдәният министрлыгы хәбәр итә.

Илкүләм проект нәтиҗәсендә республикада «Мәдәни мохит», «Иҗади кешеләр» һәм «Цифрлы мәдәният» федераль проектлары томышка ашырыла.

«Мәдәни мохит» төбәк проектына 1 миллиард 127 миллион сум бүленгән булган. Нәтиҗәдә бер ел эчендә  34 объект төзекләндерелгән, 39 мәдәният оешмасына заманча җиһазлар кайтарылган. Узган елда Арча, Баулы, Яшел Үзән, Чүпрәле, Мамадыш районнарында 50 һәм 100 урынга исәпләнгән биш авыл мәдәният йорты төзелгән. Әлеге максатларга барлыгы 106,5 миллион сум акча тотылган. 

Шулай ук төбәк проекты кысаларында ике күп профильле мәдәният объекты – Яшел Үзән һәм Алабугада Мәдәни үсеш үзәкләре сафка бастырылды. Алар ТР Президенты катнашында үткән ел 19 августта һәм 1 сентябрьдә ачылды. Теләче, Чистай, Апас, Актаныш һәм Әлмәт районнарындагы китапханәләр базасында федераль бюджет исәбенә гомуми суммасы 40 миллион сумны тәшкил иткән биш модель китапханә ачылды.

2022 елда «Иҗади кешеләр» төбәк проектын гамәлгә ашыру өчен 24,7 миллион сум билгеләнгән иде. Нәтиҗәдә, 182 иҗади проект хупланды. 78 авыл учреждениесе һәм 72 мәдәният учреждениесе хезмәткәре дәүләттән грант ярдәме алды. Өзлексез белем бирү үзәкләре базасында 3,5 мең кеше квалификациясен күтәрде. Мәдәният тармагында эшләүчеләр илнең алдынгы югары уку йортларында укып кайтты, шул исәптән – Россия театр сәнгате институтында, Мәскәү дәүләт хореография академиясендә һ.б.

Шулай ук төбәк проекты кысаларында өч зур масштаблы фестиваль үтте, алар – Федор Шаляпин исемендәге Халыкара опера фестивале, Рудольф Нуриев исемендәге Халыкара классик балет фестивале, «Нәүрүз» Төрки халыкларның халыкара театр фестивале.

«Цифрлы мәдәният» төбәк проектын гамәлгә ашыруга исә 5 миллион сум юнәлдерелгән булган. Мәдәният оешмалары мәйданчыкларында  тугыз виртуаль концерт залы сафка баскан. Бүгенге көндә барлык мәдәният учреждениеләрендә дә интернет бар.

Шулай итеп, цифрлы форматта үткәрелгән концертлар һәм спектакльләр, күргәзмәләр һәм экскурсияләр, иҗади очрашулар һәм мастер-класслар, лекторийлар һәм флэшмоблар бик тиз арада халыкта кызыксыну уятты. Ел дәвамында Менделеевск, Түбән Кама, Буа мәдәният учреждениеләре базасында өч виртуаль концерт залы ачылды. Моннан тыш, Милли электрон китапханәсендә цифрлаштырылган басмалар фонды 1 мең китап һәйкәле белән тулыланды.

Мәгълүм булганча, Россиядә илкүләм проектлар РФ Президенты Владимир Путин йөкләмәсе буенча гамәлгә ашырыла, дип хәбәр итә "Татар-информ".