Әлмәт таңнары

Ирексездән бәхетсез Тимур

Тимур үлгәннән калган, алты ай дәвамында аягына, битенә берничә катлаулы операция кичергән...

Бер автомобиль тарихы

Яшьләр үзәге янында торган эвакуаторда - яньчелеп беткән автомобиль, дөресрәге, аның калдыгы. Матәм гөлләмәсендәге кебек язып эленгән язу башта мең төрле сорау уята: ни булган, моның хуҗасы кем, исән микән? Хуҗасы - Тимур Хәсәншин. Сәламәт дип әйтеп булмаса да, исән. Май аенда Әлмәткә кайтып барганда Колшәрип авылы янында каршысына килгән машина белән бәрелешкән. Тизлеге дә кагыйдә кысаларына сыймаслык түгел - сәгатенә 92 километр тизлектә барган. Гаеп тә читтә - каршы якка килгән автомобиль хуҗасы әллә күрмәгән, әллә өлгерәм дип талпынган. Нәтиҗәсе генә аянычлы: Тимур үлгәннән калган, алты ай дәвамында аягына, битенә берничә катлаулы операция кичергән. Бүген ул таякка таянып йөри, күргәннәрен кабат-кабат күз уңыннан уздырып, үзе сыман яшьләр каршында калтырана-калтырана сөйли. Ул белә: бары тик кырыс чынбарлык аша гына тизлек яратучыларны акылга өндәп була, ә юллардагы вәзгыять һәрберебездән тора.

Соңгы сәяхәт дип кем уйлаган?

Ни дисәң дә, Тимурның, аннан да бигрәк, әти-әнисенең бәхетләре бар. Чөнки ата-анага нарасыен югалтудан да олырак хәсрәт юк. Ә монда уллары исән, бергәләп тырышсалар аякка да басар, иншалла! Ә менә агымдагы елның ун ае эчендә соңгы юлга чыккан 38 кешенең кадерлеләренә нишләргә?

31 гыйнварь. Яңа Кәшер авылында кичен автомобиль җәяүлене таптата. Зыян күрүче шунда ук җан бирә. Кыш көне шәһәребездә шуңа охшаш тагын берничә һәлакәт була. Бозлавыклы чорда Рус Акташы - Кузай арасындагы юлда бер гаиләдән әниле-уллы җир куенына керә. Бер үк көнне Кузай - Норлат арасында йөк машинасы гаебе белән җиңел машина йөртүче, Казан - Оренбург юлында шулай ук автомобиль хуҗасы һәлак була. Февраль аенда Рус Акташы - Азнакай трассасында берьюлы дүрт кешенең гомере өзелә.

Тагын язын, тагын җәен, көзен...

Август азагында калабызга юл алган ут күршеләребез - Лениногорск районыннан бер гаилә берьюлы ике баласын югалта...

- Язмыштан узмыш юк, - дияр кайберегез.

Реклама

- Алла сакланганны саклармын дигән бит, - дип әйтер икенчеләрегез.

Сәбәбе - үзебездә

Белгечләр сәбәпне ачыктан-ачык куркынычсызлык кагыйдәләрен үтәмәүдә күрә. Каешны эләктермәү, балалар өчен махсус җайланмалардан файдаланмау, алдагы автомобильне узганда каршыга килгән машинаны күрмәү яисә "өлгерәм" дип һәлакәткә бару. Ул гына да түгел, башкаларны да шуңа дучар итү.

- Әгәр дә юл хәрәкәтендә катнашучы җәяүлеләр, автомобиль хуҗалары һәм пассажирлар бер-берен һәм үзләрен хөрмәт итеп акка кара белән язылган кагыйдәләрне үтәмәүләрен дәвам итәләр икән, юллардагы вәзгыять уңай якка үзгәрмәячәк, - ди Әлмәт районы ЮХИДИ бүлеге начальнигы урынбасары Айрат Шәрәфетдинов.

- Һәлакәткә нәрсә китерә дисезме? Ашыгулар. Бигрәк тә елның хәзерге кебек караңгы фасылында. Бигрәк тә бәйрәмнәр һәм яллар алдыннан һәркем тизрәк өенә ашыкканда. Үз тәҗрибәмнән чыгып әйтәм, әгәр дә безнең бүлеккә килеп андагы хәлләргә күз салсагыз, юлда үзегезне башкача тотар идегез. Егылганда да белеп егылырга кирәк, - ди югары квалификацияле ортопед, табиб-травматолог Илдар Исмәгыйлов.

Рәдифә НОГМАНОВА

 

 

Следите за самым важным и интересным в Telegram-канале Татмедиа


Нравится
Поделиться:
Реклама
Комментарии (0)
Осталось символов: