Татарстанлыларның җавапсызлыгы борчый

Татарстанлылар яңа коронавирус инфекциясеннән саклану кагыйдәләре турында оныта. "Татар-информ «мәгълүмат агентлыгында узган матбугат конференциясендә Роспотребнадзорның ТР идарәсе җитәкчесе урынбасары Любовь Авдонина әнә шундый тәртип зарарланучылар санының артуына китерәчәк, дип белдерде.

«Безнең профилактика чараларының дәрәҗәсенә Сovid зарарлану очракларының артуы, бу очракларның кимүе, икенче дулкын, өченче дулкын бәйле булачак. Без профилактика чараларын ничек үтәүебез авырулар дәрәҗәсенә турыдан-туры йогынты ясаячак», - дип билгеләп үтте спикер.

Любовь Авдонина узган атнада 28 пассажирдан торган троллейбуста битлек һәм перчаткаларда бары тик ул гына утыруын дәлилләде. Аның сүзләренә караганда, дүртесенең битлеге ияк астында булган, калганнары шәхси саклану чараларыннан башка булган. Ведомство җитәкчесе урынбасары фикеренчә, нәкъ менә шушы кешеләр "икенче дулкын килүен түземсезлек белән көтәләр".

«Сәламәтлек саклау системасына да, Роспотребнадзор тырышлыгына да икенче дулкын килүе бәйле булмаячак. Бу безнең  халыктан, безнең актив гражданлык позицияләребездән тора. Безнең министрлык Бауман урамыннан ерак түгел урнашкан. Һәм анда барырга һәм күңел ачучы халыкның күпләп җыелуын карарга да җитә, әмма беркемнең дә шәхси саклану чаралары юк», — дип өстәде ТР сәламәтлек саклау министрының беренче урынбасары Альмир Абашев. 

Министр урынбасары фикеренчә, мондый тәртип Татарстанны авыруларны тулысынча бетерүдән ерагайта һәм Covid-19 пандемиясенең икенче дулкыны үсешенә куркыныч тудыра.

Ведомство вәкилләре социаль дистанцияне үтәргә, кулларны юарга, битлек һәм перчаткалар кияргә кирәклеген искәртте.