ОРВИ симптомнары вакытында нишләргә кирәк?

Әгәр тән температурасы 37,2 градустан югарырак булса, ютәл, борын тыгылу, күкрәктә авырту кебек симптомнар барлыкка килсә, сулыш алу авырайса, тәм тоймасагыз сырхауханәдән табиб чакыртырга кирәк. Мондый симптомнар булганда табиб 24 сәгать эчендә килергә тиеш.

65 яшьтән өлкәнрәк авыручының хроник авырулары булса, ул күптән түгел башка илдән кайткан яки зарарланган кешеләр белән элемтәгә кергән булса, медицина хезмәткәрен чакырту мәҗбүри. Әгәр табиб килеп җитә алмаса яки хәл кискен начарлана икән, ашыгыч ярдәм бригадасын чакыртырга кирәк.

Сезне хастаханәгә салалар дип куркырга кирәкми. Әгәр авыру симптомсыз яки җиңел формада уза икән (температура 38 градустан югарырак күтәрелми, сулыш алу ешлыгы минутына 22 тапкыр), госпитализация кирәк түгел.

Сеченов университетының Медицина паразитологиясе, тропик һәм трансмиссив авырулар институты директоры, вирусолог Александр Лукашев үз-үзеңне дәвалау белән шөгыльләнергә кирәкми, дип сөйләде. COVID-19 инфекциясен салкын тиюдән өй шартларында аеру мөмкин түгел. Вируска каршы чараларда препаратларны табиб язарга тиеш.

Әгәр сез авырыйсыз икән, ә тест коронавирус булмавын гына күрсәтсә дә, барыбер үз-үзеңне изоляцияләү режимын үтәргә кирәк. Лукашев аңлатканча, зарарланган кешеләрнең өчтән бере диярлек анализда тискәре нәтиҗә ала, чөнки коронавирус йоткылыктан үпкәләргә күчкән була.
 

Чыганак: tatar-inform.tatar