Әлмәт студентлары “Ел студенты-2013” премиясен дәгъвалый

Ул яшьләр эшләре, спорт һәм туризм министрлыгы, Татарстан югары уку йортлары ректорлары советы һәм студентлар лигасы тарафыннан оештырыла.

Студентлар лигасы президенты Тимур Сөләйманов билгеләп узганча, ел дәвамында фән, сәнгать һәм башка төрле юнәлешләрдә казанышларга ирешкән студентлар һәм студент коллективлары әлеге мәртәбәле премия өчен көрәшә. Татарстанның югары һәм махсус урта уку йортларыннан барлыгы 332 гариза кабул ителгән. 9 нчы мәртәбә үткәрелә торган бәйгедә Казан, Чаллы, Чистай, Әлмәт, Түбән Кама, Алабуга, Яшел Үзән, Арча, Бөгелмәдән студентлар катнашырга теләк белдергән. Быел конкурсантларны 19 номинация буенча билгеләячәкләр.