Әлмәт бакчачылары дачага бару өчен смс-рөхсәтләр саны аз дип саный

Хәзер әлеге рөхсәттән атнага ике тапкыр гына кулланырга була. Әмма үзгәрешләр үзизоляция режимын бозучыларга гына түгел, бакча тотып, уңышка өмет итүче бакчачыларга да аяк чалды. Әлмәт шәһәре бакчачылар җәмгыяте җитәкчесе Александр Белоногов сүзләренә караганда, барлык эш күләмен башкару өчен ике тапкыр гына участокка бару аз. Һәр кеше дачада куна кала алмый, моннан тыш, бакчага бару ихтыяҗы һава шартларына да бәйле. Смс-рөхсәтнең икесен дә кулланып, дачага бару мөмкинлеге калмаганда, уңышның да юкка чыгуы бар. Александр Белоногов бу мәсьәләне якын арада Татарстан Президенты Рөстәм Миңнехановка да җиткерергә тели.