Хыяллары чынга ашсын

Бу - чынбарлык. Әлмәттә яшәүче Мисбаховлар гаиләсендә булып кайткач, мин тату гаиләнең зур хәзинә булуын аңладым.

Аларның бергә гомер итүләренә - 10 ел. Аз да түгел, күп тә түгел: бер-береңнең холык-фигылен белеп, аңлашып яшәр, балалар тәрбияләр өчен менә дигән вакыт. Рөстәм дә, Наилә дә һөнәрләре буенча инженерлар. Институтка укырга кергәч кенә алар бер-берсен "очрата". Ә бит икесе дә бер балалар бакчасына, бер төркемгә йөргән ләбаса! Очрашып йөргән җиде елның икесе аеруча горурланырдай - Наилә сөйгәнен армиядән көтеп ала.
Кавышкач, кайберәүләр әйткәндәй, үзең өчен генә яшәп калуны алар уйларына да кертми. Бала - гаилә тоткасы. Рөстәмнең иң зур хыялы сәләтле, иманлы ул-кызлар тәрбияләү була, шуңа да ул өйләнешкәнче үк Наиләдән биш бала сорый. Бер-бер артлы ике нарасыйлары дөньяга килеп бераз вакыт узгач, гаилә башлыгы иптәшенә сүз ката: "Син бит миңа биш бала алып кайтырга вәгъдә бирдең..." Бу сүзләрдә шаяру да бардыр бәлки, әмма гаилә андыйлардан түгел: 35 яшендә алар өченчеләрен көтә. Тату, түгәрәк гаиләләре тагын да ямьләнер өчен санаулы көннәр генә калып бара.
- Бала тәрбияләү - төп шөгылебез, - ди Мисбаховлар беравыздан. Гаилә башлыгы бакчада эшләү, дәресләр хәзерләү, хезмәткә балаларны яшьтән үк өйрәтүгә зур игътибар бирүләрен әйтә. Әти-әниләрен дә санлап яши яшь- ләр. Күпләр кебек ата-аналардан фатир, машина өмет итү алар өчен гайре табигый хәл. Эшләгән кешегә дәүләт ипотекасын да, аз-азлап түләү шарты белән машинасын да бирә. Ба- ры күңелең чиста, хезмәтең хәләл, яшәвең чын күңелдән булсын дигән фикердә алар.
Рөстәм белән Наилә кебек- ләр меңләгәндер, әлбәттә. Әмма Мисбаховлардай бердәм, тәүфыйклы балалар тәрбияләүчеләр дәүләт өчен алтын хәзинә. Һәркем язма геройлары төсле изге максатта гомер кичерсә, хөкүмәткә ташландык балаларга "бэби-бокс"лар булдырып, җинаятьчелеккә каршы законнар язасы булмас иде. Чөнки үсеп килүче буынга иң кырыс һәм дөрес закон - аның тату гаиләсе. Бу да хыял түгел лә, барчабызның да кулыннан килә алырдай гамәл!
Филүзә Хәмидуллина
Автор фотосы