Халыкка мәйдан бирелә
Августта шәһәр һәм районда халык җыеннары узачак. Җитәкчелек белән очрашу әлмәтлеләрне борчыган проблемаларны ачыклау, шулай ук төбәкне, тулаем республиканы үстерү буенча тәкъдимнәр туплау максатыннан оештырыла.
Аларның һәммәсе дә "Бердәм Россия" партиясенең 5 елга исәпләнгән эш-гамәлләр программасына кертеләчәк.
Республика Президенты Рөстәм Миңнеханов Дәүләт Советының йомгаклау утырышында үсеш планын булдыруда татарстанлыларның да катнашу мөмкинлегенә ия булырга тиешлегенә басым ясаган иде, аеруча ул җирле территорияләрне ассызыклап үтте.
Татарстан бүген лидер төбәк булып санала һәм илебезнең башка өлкәләре өчен икътисади үсеш, социаль мәсьәләләрне чишү буенча үрнәк итеп куела. Бурыч - алга таба республикабыздагы һәр юнәлешне тагы да камилләштерү, имин тормыш өчен шартлар тудыру. Ә моның өчен җитешсезлекләрне, проблемаларны вакытында ачыклау, хәл итү сорала. Халыкка үз фикерен җиткерү өчен, димәк, мәйдан ачыла дигән сүз. Хәер, Әлмәттә бу юнәлеш күптән үсеш алган. Ел саен ТОСМСларда, авылларда шәһәр һәм район җитәкчелеге, идарә-учреждение вәкилләре белән уздырылучы җыелышларда проблемаларны ачыктан-ачык уртага салып сөйләшүләр безгә ят түгел. Төбәгебездә башкарылган байтак гамәлләр әнә шул аралашулар нәтиҗәсе дә. Иң мөһиме, Әлмәттә куелган бурычларны гамәлгә ашыру нефтьчеләр ярдәме белән бик тиз һәм сыйфатлы үтәлә. Исбатлау өчен мисаллар китерү дә кирәкми, тәрәзәдән урамга бер күз ташлау да җитә: төзелешнең, төзекләндерүнең тукталганы юк, шәһәр һәм авыллар чәчәк ата, яшәү шартларын яхшырту өчен дистәләгән программалар эшли. Алар дәвамлы, шунысы мөһим.
Гөлназ ГЫЙЗЗӘТУЛЛИНА
P.S. Әлбәттә, бүген тәкъдим-фикерләрне җиткерү өчен мәйдан җитәрлек. Кайнар линия, "Халык контроле", "Район башлыгына сорау бир" хезмәтләре уңышлы эшләп килә. Алар аша җитәкчелек бик күпләрне ишетте, мөрәҗәгатьләр буенча чаралар күрде, планнар билгеләде. Әмма шулай да күзгә-күз карап сөйләшүгә ни җитә?
Следите за самым важным и интересным в Telegram-каналеТатмедиа